Wir Albrecht vnd Ott von gots gnaden herczogen ze Osterreich vnd ze Styr veriehen vnd tun kunt offenlich mit disem brief, daz wier vnserm getriwen lieben Reinprechten von Eberstorf chamrer in Osterreich vmb seinen dinst so er vns des vordern jares gen Behem getan hat, gelten sullen vnd schuldig sein sechczig phund phenning Wienner vnd seczen im dorumb einen zehent der gelegen ist ze Witow den Leupolt von Sachsengang von vnserm lieben enen chvnig Rudolfen selig vor ze lehen gehabt hat vnd den vns der selb Leupolt ze vro^emden handen pracht hat, also daz er vnd sein eriben den selben zehent mit allen nuczen vnd rechten so darzue gehoeret, in phandes weis an abslag als lang innehaben vnd niezzen sullen vncz daz wier, vnser erben oder nachchomen von im oder von seinen erben den selben zehent vmb daz voergeschriben guet gar vnd genczlich ledigen vnd loesen. Vnd des ze einem offenn verchund geben wir im disen brief besigelt mit vnsern insigeln, der geben ist ze Wienne an sand Nyclas tag, do man von Christes gebuert zalt tausent drevhundert jar, dornach in dem drey vnd drizzigistem jar.

Source Fulltext: ZAHN, Codex Diplomaticus (=FRA II/35, Wien 1871) S. 212