Ich Margret abtissinn des chlosters ze Judenburch sant Claren ordens vnd wir der conuent gemainlich des selben chlosters veriehen offenleich an disem brieue, daz wir haben verchoufet vnd ze choufenn geben dem erwirdigen herren bischof Chu^onraten von Freisingen vnd seinem gotshause die hu^obe die wir hieten ze Fevstritz in dem dorfe ligend da der Chayser auf gesezzen waz, dieselben hu^ob vns gaben her Fridreich vnd Vlreich von Savrow zu ir swester, die hu^ob haben wir dem vorgenantem herren bischof Chu^onraten vnd seinem gotshause ze choufenn geben vmb zehen march silbers, derselben zehen march sein wir von im vnd von seinem gotshause gar vnd genczleich gewert vnd verczeihen vns fuer (vn)s selb vnd fuer vnser nachchomen aller der recht dev wir haben oder gehaben moe(chten a)n derselben hu^ob. Vnd dar veber ze ainem vrchuend haben wir dem vorgenanten (herren bysc)hof Chu^onrad vnd seinem gotshause disen brief geben versigelt mit vnserm anhangendem (insigel). Dirr brief ist geben ze Judenburch do man zalt (von Chr)istes gebuert drevtzehen hundert iar vnd dar nach in dem fuenf vnd dreizzigistem jar(e, an Pfin)cztag vorsant Johans tag gots tauffers.

Source Fulltext: ZAHN, Codex Diplomaticus (=FRA II/35, Wien 1871) S. 235-236