Ich Chu^onrat von Vilanders zu den zeiten purchgraff vnd phleger auf Haberberch vergihe an disem prieff allen den die in sehent oder horent lesen, daz ich hab gehaizzen ausrueffen vnd chunden auf der hofmarch zv^o Inichingen drev maenod, ob yemant wold pau besten von dem gotzhaus von Freysingen, vnd besante die naehsten erben die zu^o der hu^oben gehorten die da leit ob Inichingen an dem perge vnd haizzet daz Chreucztal vnd fragt sey, ob siz wolden besten vnd ob siz verbesen moechten, do wolden si ir nicht vnd mochtens auch nicht verwesen vnd gaben mierz auf ledechleich als ain gu^ot daz dem gotzhaus ledick waz worden do goczgewalt waz vnd der leut sterb. Do tet ich als ain phleger an dez gotzhaus stat vnd wold die hu^ob nicht ode lazzen ligen vnd bat vnd benot Peulein den zymmer man von Toblach wan er daz gotzhaus angehoert, daz er die h^ob bestu^ond vnd han ich im die vorgenant hu^ob die da haizzet Kreucztal hin gelazzen vnd verlihen fuer ain lediges gu^ot als dem goczhaus ledick waz worden mit allen den rechten vnd nuczen die dar zu^o gehoerent, besu^ocht vnd vnbesu^ocht, gepawens vnd vngepauens. Ich vergihe auch vorgenanter Chu^onrat, daz ich dem Paeulein dem egenanten die vorgenante hu^obe han verlihen mit aim saemleichen gedinge, daz er mit dem schergen ambt nicht sol ze schaffen haben, chlein noch groz, vnd sol von der hu^oben dem schergen geben sein zins den er im durch recht geben sol vnd sol auch dem purchgraffen auf Haberberch geben allen den zins, der da von gehoert von recht oder von alter gewonhait vnd sol auch da von tu^on allen den dienst der da von gehoert, swie der genant ist. Daz im daz staete beleib, gib ich im disen offen brieff versigelt mit meinem anhangunden insygel zu ainer vrchunde der warhait. Der sache sint geczeugen Chu^onrat Francken aydem, Hainreich der Sluderpacher, V^olreich der Vyertaler, Ruele des Keysers aydem, Nickel von Biczmans hu^oben vnd ander erber leut genueg. Daz ist geschehen nach Christ gepurt tausent iar, dreu hundert iar, dar nach in dem nevn vnd vierzigisten iare, an sand Pauls tage nach Weynachten.

Source Fulltext: ZAHN, Codex Diplomaticus (=FRA II/35, Wien 1871) S. 288-289