Ich Nyclaw von Gerlochstayn vergib des offenleih mit disem priff, daz ich mit voller czal enphangen han vnd auch ze rehter zeyt ahtodhalb vnd dreyzzich march Agleyer phenning von Niclavn dem schreiber vnd amman ze Lok die er mir geben hat von des gotshous guet von Freysing vnd auch von meiner herren geschaeft hern Welreihs von Walse vnd hern Hainreichs von Chuenigswisen phleger des egenanten gotshous, an den hundert marchen die ich mier pestaetigt han fuer den schaden den ich vnd Nikel der Revtenberger mein svn vnd vnser levt genomen haben ouf der March von des gotshous levten von Freysing noch pey mayster Pytrolfs zeiten der dv^o phleger was, do ich Reutenberger mit dem gotshous chriegt. Auch hat der egnant Nyclawe der schreiber von den hundert marchen geben hern Herman dem Chuemer drithalb vnd sehczich march Aglayer phenning mit meinem gu^oten willen fuer den schaden, der im vnd seinen levten von mir, von meinem svn vnd von vnsern levten geschehen ist, wand im die phenning gesprochen wurden von erbern levten mit vnsrer gunst vrid gueten willen, da von sag ich egnanter Nyclawe fuer mich vnd fuer Nikelein meinn svn vnd fuer allen vnser erben das gotshous von Freysing gaenczleih ledich vmb das vorgnant gu^ot alle des gotshous hauptlevt, phleger, amptlevt die es inne habent vnd hernah inne gewinnent vnd swaz zve dem gotshous gehoert, levt vnd gu^ot, gesueht vnd vngesueht, daz wier noh nyemand ander vmb das egnant gu^ot kegn in vordrang noh ansprah fu^orpaz niht haben muegen noh schu^ollen vmb erchen noh vmb schaden mit chlag noh mit ansprah vor wertleihem noh vor gaystleihem gerihtt, wand wir gaenczleih gewert vnd berihtt sein nah vnserm willen. Geschaehe dar veber dem egenanten gotshous oder den seinen an levten oder an guettern oder swaz dar zv^o gehoert, vordrung, gepresten oder ansprah wie sih daz fuege oder swie der genant waer, den schullen wir in oder vnser erben gelten vnd ablegen an alle widerred vnd an allez vercziehen vnd schullen sev auch vertreten vnd verantwurtten swa si des peduerffen vnd schuellent daz alles gesu^ochen vnd haben ouf vns, ouf vnsern trewen, ouf vnsern erben vnd ouf alle dev vnd wir haben vnuerschidenleih, vnd ob wier sev niht wearen vnd volfueren wolten als vor verschriben ist, so schol sev der hauptman in dem lande ze Chrain weren vnd rihten von aller vnser hab wa wir die haben, mit vnserm gu^oten willen. Auch vergih ich vorgenanter Nyclav der Reutenberger vnd lob daz pey meinen trewen die vorgeschriben geluebde, rihtigund (!) vnd werung swie si penant sint, gaenczleih staet ze haben vnd ze pehalten dem egenanten gotshous vnd allen den seinen oder swaz dar zv^o gehoert, ich vnd alle mein erben, wand es alles mit meim gu^oten willen geschehen vnd verschriben ist. Dar veber zve ainer ganczen staetichait aller der vorgenanten sache geben wir payde ich Nyclawe von Gerlochstayn vnd ich Nikel der Revtenberger disen offen prief versigelt mit vnsern anhangenden insigeln der geben ist ze Lok do man zalt nah Christes gepu^ord drevczehn hundert iar vnd in dem nevnten vnd vierczichisten iar, des naehsten Samztags nah sand Florians tag.

Source Fulltext: ZAHN, Codex Diplomaticus (=FRA II/35, Wien 1871) S. 292-293