Ich Fridrich von Walse von Ens vergich vnd bekenn offenlich mit disem brief fuer mich vnd alle mein erben, daz mir der erwirdig fuerst min gnediger herr pyschof Albreht ze Frysingen min vesti (!) Vdmeruelt vnd daz lantgriht da selben eingeantwrt vnd empholhen hat mit dem purgsaezz als her nach geschriben stat, daz ist daz man mir alle iar ab dem kasten geben sol sehs mutt korns vnd zehen mutt habern allez der mindern mazz, dar zv^o sol ich han den mayrhof der in dem margt ze Vdmeruelt gelegen ist vnd dar zv^o sol man mir jaerlich geben ain vas Wachowers vnd driu vas Holenburger wins, vier schwin allez an geuerd, vnd hundert kaes. Es sol och dieselb purchu^ot jaerlich anheben an sant Georgen tag vnd hin vmb weren von dem selben tag ain ganczes jar vnd sol ich dieselben vesti vnd daz lantgriht mit lu^eten vnd gu^oten di dar zv^o gehoerent, besorgen vnd behueten mit ainem minem erbern diener, er si ritter oder kneht, da mit si wol besorget sien, vnd sol ich noch dehain mein diener der von minen wegen da siczet vber die vorgeschriben purchu^ot vnd lantgriht nischnit (!) mer ze vordern noch ze schaffen han, weder mit luten noch mit gu^oten, wan daz ich si getriulich versprechen vnd friden sol als min aigenlich gu^ot. Man sol och wizzen, daz alle todschleg die geschehent in dem vorgenanten lantgriht, in minez vorgenanten herren pischof Albrechts kamer suellen gehoeren, an allain daz ain lantrihter da von nemen sol sehs schilling Wienner phenning vnd nit mer, vnd daz vebrig sol er ainem bischof triulich inbringen. Es sol och die vorgenant vesti Vdmeruelt minez vorgenanten herren bischof Albrehts ze Frisingen vnd siner nachkomen offens hus sin gen allermenclich. Swenn ich och minem vorgenanten herren bischof Albrehten ze Frisingen oder sinem nachkomen der von dem stu^ol ze Rome vnd pabst pischof ze Frysingen bestet w^erde, fuerbaz ze purggrauen nit fu^ogte, swenn er mich dann mit sinem brief ermant, so sol ich im zehant vnd vnverzogenlich die vorgenant vesti, lantgriht vnd mayerhof wider in antwrten vnd ledig lazzen. doch also daz man mich der purchu^ot rihten sol die sich dann ergangen het. Vnd ze ainem offenn vrkuend allez dez hie vor geschriben stat, gib ich fuer mich vnd alle min erben disen brief versiget mit minem anhangden insigel, der geben ist do von Cristes gebuert waren driuzehenhundert jar vnd darnach in dem fuenf vnd fuenfczigistem jar, an sant Gregoergen tag dez hailigen babsts.

Source Fulltext: ZAHN, Codex Diplomaticus (=FRA II/35, Wien 1871) S. 305-306