Nicolaus dei gratia sancte sedis Aquilegensis patriarcha. Dilecto nobis in Christo Henrico de Mu^olhusen clerico Moguntine diocesis salutem in domino. Pro parte reuerendi in Christo patris domini Alberti dei gratia episcopi Frisingensis a nobis est nouiter postulatum, vt cum ipso tamquam patronus plebis in Lok nostre Aquilegensis diocesis ad preces et requisitionem dilecti in Christo Hilprandi Hak plebani plebis eiusdem te tamquam ydoneum et sufficientem suo et successorum suorum nomine perpetuum vicarium confirmauerit memorate plebis in Lok, certis tibi redditibus pro substentatione deputatis, non obstante si dicta plebes seu ecclesia in Lok est mense ipsius domini episcopi per sedem apostolicam incorporata alias uel unita, dictam perpetuationem dignaremur auctoritate ordinaria in spiritualibus confirmare. Nos uero attendentes tue merita probitatis super quibus tibi laudabile testimonium perhibetur, ac uolentes etiam dictorum domini episcopi ac plebani uotis satisfacere in hac parte vtque tuus animus tanto feruentius accendatur ad ea que ipsis plebano et plebi vtilia sunt, quanto honoratus in illis perspexeris statum tuum esse stabile atque firmum, perpetuationem de te ut prefertur, in dicto vicariatu factam gratam habentes ipsam in spiritualibus auctoritate ordinaria tenore presentium confirmamus et nos etiam te omni iure et forma quibus melius possimus, eadem auctoritate instituimus perpetuum vicarium plebis in Lok superius nominate, saluis semper et reseruatis dicto plebano iuribus consuetis, ita tamen quod te cedente uel decedente successor tuus qui fuerit ibi positus, perpetuus propterea non existat. In quorum omnium testimonium presentes fieri iussimus nostri sigilli appensione munitas. Datum in castro nostro Glemone, die XVI. mensis Nouembris, anno dominice natiuitatis M. CCC. LV., indictione VIII.

Source Fulltext: ZAHN, Codex Diplomaticus (=FRA II/35, Wien 1871) S. 307-308