Reuerendissimo in Christo patri et domino, domino Ortolfo sancte Saltzburgensis ecclesie archiepiscopo apostolice sedis legato, domino suo generoso Hartnidus plebanus ecclesie sancti Martini in Oberwelcz obedienciam promptam cum oracionibus in Christo deuotis. Quia reuerendus in Christo pater, dominus meus generosus dominus Paulus episcopus Frisingensis ob diuini cultus augmentum michi ac ecclesie mee prefate de bonis sibi a deo collatis necnon de bonis incolarum opidi prefati in Welcz ac per societates seu fraternitates eiusdem opidi in Welcz sponte, gratuite ac liberaliter oblatis ob suam, predecessorum ac successorum suorum salutem necnon dictorum incolarum et transeuncium per opidum ipsum comoditatem certos redditus atque bona que ad duodecim libras vsualis monete annuorum reddituum se extendunt, obtulit, tradidit et donauit, sponte ac ex certa sciencia pro me et successoribus meis recipienti perpetuo possidenda cum onere infrascripto, vt ego ac inantea rector parrochialis dicte ecclesie in Welcz de eisdem redditibus et bonis vltra conswetum numerum presbiterorum qui hactenus teneri consweuerunt in illa, vnum perpetuo teneamus sacerdotem, et vltra consweta missarum et aliorum officiorum obsequia que absque diminucione seruari debent et adimpleri sicut prius, singulis diebus circa ortum solis in capella hospitali dicti opidi in Welcz annexa pulsata campana prima cantando vel legendo celebremus seu celebrari faciamus vnam missam, hiis diebus dumtaxat exceptis quibus huiusmodi missas priuatas non est solitum celebrari, et si ipsum locum vel ecclesiam supponi contigerit ecclesiastico interdicto, eandem missam ianuis clausis, exclusis quoque excommunicatis et interdictis, obmisso eciam campane sonitu legendo celebrabimus aut celebrari faciemus sicut fieri potest et debet tempore interdicti. Quociens vero ego vel successor meus qui pro tempore fuerit, aut vicarius me vel successore meo absente circa hoc negligentes fuerimus seu remissi et ad trinam requisicionem consiliariorum iuratorum opidi predicti aut quorundam ex eis missam ipsam in capella prefata non resumpserimus et neglectas missas infra vnius mensis spacium non suppleuerimus seu suppleri faciemus, pro qualibet missa neglecta lapso dicto mense magistro hospitalis prefati sexaginta denarios vsualis monete in vsus pauperum ibidem degencium conuertendos infra octo dies dictum mensem immediate sequentes integre exsoluemus, alioquin suspensionis ab ingressu ecclesie sentenciam per reuerendam paternitatem vestram in confirmacione huius obligacionis nostre ferendam cui me, successores et vicarios meos ac successorum meorum sponte submisi, incurremus ipso facto. Reuerendissimam itaque paternitatem vestram deuotus exoro, quatenus ob diuini cultus augmentum prefata omnia et singula auctoritate ordinaria approbare, ratificare, roborare et confirmare ac predictam suspensionis sentenciam statuendo ferri dignemini generose vt exinde vestrorum au(gea)tur cumulus meritorum. Datum in Oberwelcz, die prima mensis Septembris.

Source Fulltext: ZAHN, Codex Diplomaticus (=FRA II/35, Wien 1871) S. 329-330