Wier Paulus von gots gnaden byschof ze Freising tu^on kuend offenlich mit disem brief allen die in sehnt, hoernt oder lesent, daz wir dem edlen herrn Dietreichen von Losenstein die besunder gnade getan haben, daz wier vnd vnser nachkoemen alle die lehen die er von vns vnd vnserm gotzhaus nue zelehen hat oder fuerbar vnder vns chauft, ob er oder sein suen Dietreich an suene verschieden, iern tochterne leihen sullen. Mit vrkund ditz brief besigelt mit vnserm insigel, geben ze Wienne an Phintztag nach dem Suntag so man sang Quasi modo geniti, nach Christes gepuerd dreutzehen hundert jar, dar nach in dem vier vnd sechtzigistem jare.

Source Fulltext: ZAHN, Codex Diplomaticus (=FRA II/35, Wien 1871) S. 341