Wir Paulus von gots gnaden byschof ze Freysing bekennen mit disem offen brief, daz wir von besundern gnaden vnsers goczhauses haus ze Alstdorf das gelegen ist bey Amsteten mit sampt den guetern die darzue gechaufft sind von dem Schafferuelder, mit alle dem vnd darzue gehoert, in satzes weis ingeantbuertet haben vmb achczig phunt Wienner phening Chadolten von Zintzendorf vnd Annen seiner wirtinn vnd Gilgen voa Aneueld der egenanten Annen brueder in allen den rechten vnd puenden als si Gotfrid von Aneueld der obgenanten Annen vnd Gilgen vater ennenther in saczes weis innegehabt hat von vnserm voruodern seligen byschof Chuenraten von Freysingen vnd als der brief saget den der obgenant Gotfrid von dem egenanten byschof Chuenraten darumbe gehabt hat. Vnd des zu ainem offenbaren vrkund haben wir in geben disen brief versigilten mit vnserm anhangenden insigil. Geben ze Wienn an sant Vrbain tage nach Christes gepuerd dreutzehenhundert iar, darnach in dem vierden vnd sechczigisten iare.

Source Fulltext: ZAHN, Codex Diplomaticus (=FRA II/35, Wien 1871) S. 342