In nomine Sancte et individue Trinitatis. Que geruntur in tempore, ne labantur processu temporis et ne possit in posteris apponi calumnia, litterarum appicibus ac testimonio solent perhemnari. Sciant ergo presentes ac posteri, quod tempore Iohannis abbatis udvornici de Uosian istos quinque fratres: Paulum, Euchca, Cese, Eliam, Sciga, in presentia abbatis I(ohannis) super hiis inpetierunt, quod de societate eorum interessent et eodem debito, quo ecclesie Sancti Martini servire tenebantur, illi similiter tenerentur. Hoc audito abbas, vir discretus, terminum discutiendi causam istam utrique parti certum prefixit, die Iovis videlicet instanti post Pascha anno ab incarnatione Domini M.CC.I., [1201. márc. 29.] ad quem terminum utraque pars, videlicet quinque fratres predicti et udvornici de Uosian in presentia abbatis iudicis omnes insimul comparaverunt, et ibidem udvornici prefati quinque fratres illos de societate eorum esse vel fuisse vel aliquo servitio cum eis astringi coram abbate communiter negaverunt et coram iobagionibus, qui interfuerunt, quorum hec sunt nomina: Iohannes comes, Cib, tunc temporis factus comes curialis, comes Uuosos, prestaldus Alexius, filius Gude, et idem quatuor huius rei testes asignantur, quod ne potuisset alicuius protervitas infringere, placuit ita abbati et fratribus, illos quinque fratres cyrographo et sigillo ecclesie premuniri. Notarius fuit magister Iiuido, decanus Benedictus, custos Gregorius, ospitalaris magister abbas Martinus.