Gregorius episcopus, servus servorum Dei, dilecto filio magistro Egidio subdiacono et capellano nostro salutem et apostolicam benedictionem. Ex parte dilectorum filiorum ... abbatis et conventus Sancti Martini de Pannonia fuit propositum coram nobis, quod cum ... prepositus Sancti Thome Strigoniensis ipsos super quadam summa pecunie coram ... priore de Pelis auctoritate apostolica conveniret, ipsi habentes priorem eundem suspectum ex eo, quia cum ipso similem causam facti et iuris habebant, dari sibi arbitros, coram quibus suspicionem probarent huiusmodi, petierunt, quos cum dictus prior eis concedere denegaret, nostram audientiam appellarunt. Ideoque discretioni tue per apostolica scripta mandamus, quatinus, si est ita, revocato in statum debitum, quicquid post appellationem huiusmodi temere inveneris attemptatum, in causa ipsa iuxta prioris apostolici mandati tenorem appellatione remota previa ratione procedas. Alioquin partes ad iandicti (!) prioris remittas examen, appellantes in expensis legitimis condempnando. Testes autem, qui fuerint nominati, si se gratia, odio vel timore subtraxerint, per censuram ecclesiasticam appellatione cessante compellas veritati testimonium perhibere. Datum Laterani Idibus Martii, pontificatus nostri anno tertio. [1230. márc. 15.]