Gregorius episcopus, servus servorum Dei, venerabili fratri ... episcopo Geuriensi et dilectis filiis ... de Sancto Gothardo et ... de Tota abbatibus Geuriensis diocesis salutem et apostolicam benedictionem. Dilecti filii ... abbas et conventus monasterii Sancti Martini de Pannonia, sua nobis insinuatione monstrarunt, quod cum olim causa, que inter ipsos ex parte una et nobilem virum Demetrium de genere Cac Geuriensis diocesis super monasterio Marie de monte Ouicin cum possessionibus suis et insula Obda de Danubio ex altera vertebatur, venerabili fratri nostro ... Waciensi episcopo et coniudicibus suis fuerit a sede apostolica delegata, eis tandem negotium remittentibus ad apostolice sedis examen, nos illud dilecto filio E(gidio) subdiacono et capellano nostro, tunc in Ungaria commoranti duximus committendum. Cui cum plene constiterit, quod eis propter eiusdem nobilis contumaciam in possessionem rerum petitarum inductis nulle fructus, ex hoc protervior in eadem contumacia perseveraverat ultra annum, licet ab eo pluries monitus extitisset, ut per se ve1 procuratorem idonum in sua presentia prefatis ... abbati et conventui responderet, demum veram predictarum rerum possessionem adiudicavit eisdem, dictum nobilem in expensis legitimis condempnando. Quare nobis humiliter supplicarunt, ut processum huiusmodi apostolico dignaremur munimine roborare. Quocirca discretioni vestre per apostolica scripta mandamus, quatinus processum eundem, sicut est legitimus, faciatis per censuram ecclesiasticam appelatione remota firmiter observari. Quod si non omnes hiis exequendis potueritis interesse, tu frater episcope cum eorum altero ea nichilominus exequaris. Quicquid autem super hoc factum fuerit, nobis curetis absque more dispendio vestris litteris intimare. Datum Reate II. Kalendas Octobris, pontificatus nostri anno quinto. [1231. szept. 30.]