Nos capitulum ecclesie Beate Virginis de Iaurino memorie commendamus, quod religiosus vir dominus frater Nicolaus, abbas monasterii Sancti Martini de Sacro Monte Pannonie, ad nostram veniendo presentiam in persona universorum virorum religiosorum sub regula Sancti Benedicti in regno Hungarie degentium gravi detexit cum querela, quod nonnulli seculares homines in ipso regno Hungarie existentes, qui Dei timore postposito, iurisque rigorem non verentes, possessiones nonnullorum monasteriorum prefati ordinis, sylvas, pyscinas, terras, tributa, portus, fora et alia diversa iura eorumdem per divos reges Hungarie et alios viros Christicolas fundatores ipsorum monasteriorum et alios ipsis monasteriis et usui fratrum ordinis Sancti Benedicti in prememorato regno Hungarie datas et applicatas, ymmo et aliqua ex ipsis monasteriis pro se occupassent et de presenti uterentur in grande salutis eorum dispendium et iacturam religionis prelibate satis magnum. Quare ne ipsi occupatores aliquando per tam iniquas occupationes diversis exquisitis figmentis et coloribus factas prefatas possessiones vendicare, quomodolibetque sibi usurpare valeant, signanter vero pastores et abbates eorundem monasteriorum ne aliqua iura possessionaria et alia quevis ipsorum monasteriorum quocunque nomine vocitata in genere vel singulari quacunque arte aut ingenio et quocunque ac qualitercunque quibuspiam factis vel faciendis, ipsos autem se in eodem qualibet intromissione et sibi ipsis appropriatione, apperpetuatione prohibuit publice et manifeste coram nobis. Datum in festo Beati Michaelis archangeli, anno Domini millesimo trecentesimo. [1300. szept. 29.]