Amicis suis reverendis capitulo Posoniensi magister Nicolaus filius Leukus, vicecomes Posoniensis amicitiam paratam cum honore. Dicitur nobis in persona Pauli filii Iohannis et Iohannis filii Ladizlai nobilium de Gutur, quod populi seu iobagiones religiosi viri fratris Emerici, abbatis de Sacro Monte Pannonie, de villa Dyenus feria secunda proxima ante festum Beati Nicolai confessoris proxime preteritum [1306. dec. 5.] noctis in silentio ex preconcepta malitia ad predictam possessionem Gutur manibus armatis potentionaliter venientes primo domum Egidii villici prefati Pauli de eadem Gutur irruentes, fractis ostiis domorum suarum eundem Egidium et Paulum proximum suum, necnon dominam consortem ipsius Egidii graviter verberassent, de hoc non contenti deinde eadem nocte ad domum prefati Pauli in eadem Gutur habitam venientes eundem Paulum, si tunc domi reperire potuissent, interficere voluissent, sed ipsum domi non reperientes, hinc eadem nocte ad domum prenominati Ioannis filii Ladizlai similiter in eadem Gutur habitam accedendo eundem Ioannem [ibidem crudeliter] interficere voluissent, sed dextera domum protegente ipsum interficere non valentes Ienslinum approdianum eiusdem [existentem in eadem domo] sua miserabili nece interemissent culpis eorum nullis requirentibus, lite tamen inter eundem abbatem a[b una, parte vero ex altera eundem Iohann]em pendente. Super quo amicitiam vestram diligenter requirimus per presentes, quatenus vestrum mittatis [hominem pro testimonio fide d]ignum, quo presente Mychael de Padinz vel Petrus de Konth aut Iohannes filius Emerici, aliis absent[ibus homo noster ex numero] iudicum quatuor dicti comitatus ab omnibus, quibus decet et licet, palam et occulte, diligenter [inquirendo experiantur, rescia]nt et inquirant omnimodam veritatem. Et post hec, prout exinde vobis veritas constiterit nobis fideliter rescribatis et amice. Da]tum sabbato proximo post festum Beate Lucie virginis, anno Domini M° CCC° s[e]x[to]. [1306. dec. 17.]