Frater Ladislaus, Dei gratia humilis abbas monasterii Sancti Martini de Sacro Monte Pannonie, dilecto in Christo filio Hertlino, iudici Posoniensi, salutem in Domino. Cum a nobis petitur, quod iustum est et honestum, tam vigor equitatis, quam ordo exigit rationis, ut id per solicitudinem nostri officii ad debitum perducamus effectum. Sane petitio tua nobis exhibita continebat, quod, cum bone memorie frater Iohannes, predecessor noster, censum unius domus in medio civitatis Posoniensis, quam olim nomine dicti monasterii possidebas, de qua quidem domo ipsi condam abbati predecessori nostro a decem annis, singulis annis tres marcas latorum denariorum monete Viennensis, duas marcas piperis, unam marcam thuris, semper marcam denariorum cum decem pensis computando, solvere tenebaris, de consensu communi fratrum suorum et capituli totius ecclesie Sancti Martini, de quorum numero tunc eramus et etiam de bona voluntate sua presente comite suo Thoma propter legitimam necessitatem ipsorum quondam abbatis et monasterii dictas tres marcas denariorum cum pipere et thure vendiderit, dederit et concesserit tibi pro viginti octo marcis, semper marcam cum decem pensis computando, perpetuo ac libere in filios filiorum possidendas, prout in litteris dicti condam abbatis et conventus dicti monasterii eorum sigillatis sigillis, quas vidimus et legimus non cancellatas, non abrasas, non abolitas, nec in aliqua sui parte corruptas, plenius continetur, venditionem, d[acionem] et concessionem huiusmodi confirmari tibi per nostras litteras deberemus. Nos itaque considerantes causam, que dictum quondam abbatem et conventum dicti monasterii ad predicta digne moverunt, petitioni tue huiusmodi annuentes, quod super hoc a predicto quondam abbate et conventu provide factum est, ratum et gratum habentes, id auctoritate, qua fungimur, confirmamus et presentis scripti patrocinio communimus. In cuius rei testimonium et predicti Hertlini et heredum suorum cautelam presentes litteras nostras fieri fecimus et nostri sigilli appensione muniri. Datum Posinii, X. Kalendas Ianuarii, anno Domini millesimo trecentesimo nono, pontificatus domini Clementis pape anno quinto. [1309. dec. 23.]