Nos Stephanus, regni Hungarie pallatinus (!) et iudex Comanorum, memorie conmendantes tenore presentium significamus, quibus expedit universis, quod nobis in quindenis festi Omnium Sanctorum [1390. nov. 15.] una cum regni nobilibus in sede nostra iudiciaria sedentibus, causalesque processus quorumlibet coram nobis litigantium in statera equitatis demetientibus, religiosus vir frater Petrus prepositus pro domino fratre Stephano abbate et conventu monasterii Sancti Martini Sacri Montis Panonie cum procuratoriis litteris eiusdem conventus ad nostram veniendo presentiam, in personis eorundem domini abbatis et conventus quasdam litteras domini Nicolai, olym similiter regni Hungarie palatini, adiudicatorias in anno Domini millesimo trecentesimo quinquagesimo quinto, Bude, vicesimo die octavarum festi Penthecostes [1355. jún. 19.] confectas, tenoremque litterarum privilegialium excellentissimi condam principis secundi Andree, tertii Bele regis filii olym incliti regis Hungarie beate recordationis, sub anno Domini millesimo ducentesimo vigesimo tertio [1223.] emanatarum, aureaque bulla bullatarum coram eodem domino Nicolao palatino in iudicio exhibitarum, tenoremque excellentissimi olym principis Sancti Ladislai regis et eius collationes dicto monasterio Sancti Martini factas et ipsius domini Andree proprias donationes eidem monasterio collatas in se continentes nobis presentavit, in quorum, scilicet dominorum Ladislai et Andree regum privilegiorum tenoribus prefatus frater Petrus quandam clausulam infrascriptam pro conservatione et tuitione iurium predicti monasterii Sancti Martini ipsis domino abbati et suo conventui necessariam fore allegando, nos in personis eiusdem domini abbatis et dicti sui conventus cum instantia in eo postulavit, ut ipsam clausulam de predictis litteris ipsius domini palatini adiudicatoriis et tenorem prescriptorum privilegiorum memoratorum dominorum Ladislai et Andree regum in eisdem litteris adiudictoriis contentis verbotenus excipere, litterisque nostris privilegialibus conscribi faciendo prelibatis domino abbati et suo conventui dare dignaremur premissam ad cautelam. Cuius quidem clausule ex tenoribus prescriptorum privilegiorum ipsorum dominorum Ladislai et Andree regum in predictis litteris palatinalibus adiudicatoriis contentis excepte series verbalis dinosscitur esse talis:||
Item etiam cum novimus antecessorum nostrorum devotionem in misericordie operibus semper fuisse ferventem, non solum elemosinas eorum Deo collatas observari volumus, verum etiam proprii operis zelo ferventi ampliare donationes intuitu servitiorum abbatis Uras et maxime propter edificationem fabrice monasterii, cui nos specialiter tenemur, confirmamus nostri privilegii auctoritate consilio et consensu omnium primatum regni nostri tertiam partem Danubii et piscature integraliter, que tanya dicitur, que castrensibus Zulgageuriensibus et udvarnicis regis de villa Gunuu contingebat cum tota tertia parte voraginis, quo vulgo Ewren dicitur, infra omnes terminos eiusdem ville et precipue consilio Nicolai comitis, tunc temporis palatini nostri, cuius etiam tertia pars ad palatinatum pertinebat.||
Nos itaque prescriptam petitionem annotati fratris Petri iustam et iuri consonam eo, quod predicta clausula iura antedicti monasterii Sancti Martini, ut prescribitur, tangit et exprimit, fore agnosscentes, eandem clausulam de verbo ad verbum de prescriptis tenoribus privilegiorum memoratorum dominorum Ladislai et Andree regum in ipsis litteris palatinalibus adiudicatoriis contentis excipi, presentibusque litteris nostris privilegialibus inseri et transsumpmi et prefatis domino abbati et suo conventui dari fecimus iustitia conmuni observata. Datum in Vyssegrad, sexto die quindenarum festi Omnium Sanctorum predictarum, anno Domini millesimo trecentesimo nonagesimo. [1390. nov. 20.]