Martinus episcopus, servus servorum Dei, dilectis filiis universis vasallis monasterii Sancti Martini de Sacro Monte Ordinis Sancti Benedicti ad Romanam ecclesiam nullo medio pertinentis Iauriensis diocesis salutem et apostolicam benedictionem. Summi dispositione rectoris ad regimen universalis ecclesie deputati curis assiduis angimur et assidua meditatione pulsamur, ut opem et operam, quantum nobis ex alto conceditur impendamus, quod orbis ecclesie et monasteria universa pastorum regiminibus destituta, presertim Romane ecclesie immediate subicta (!) per nostre providentie ministerium viris committantur idoneis, qui sciant, velint et valeant ecclesias et monasteria ipsa eis commissa studiose regere et feliciter gubernare. Dudum siquidem ... etc. usque incrementa. Quocirca universitati vestre per apostolica scripta mandamus, quatinus eundem Nicolaum abbatem devote suscipientes et debita honorificentia prosequentes et fidelitatem solitam, necnon consueta servitia et iura a vobis sibi debita exhibere integre studeatis, alioquin sententiam sive penam, quam idem abbas rite tulerit, sive statuerit in rebelles ratam habebimus et faciemus auctore Domino usque ad satisfactionem condignam inviolabiliter observari. Datum Rome apud Sanctos apostolos IIII. Idus Ianuarii, pontificatus nostri anno octavo.