Martinus episcopus, servus servorum Dei, dilecto filio Nicolao Venceslai de Dobo, abbati monasterii Sancti Martini de Sacro Monte Ordinis Sancti Benedicti ad Romanam ecclesiam nullo medio pertinentis Iauriensis diocesis salutem et apostolicam benedictionem. Summi dispositione rectoris ad regimen universalis ecclesie deputati curis assiduis angimur et assidua meditatione pulsamur, ut opem et operam, quantum nobis ex alto conceditur, impendamus, quod orbis ecclesie et monasteria universa pastorum regiminibus destituta, presertim Romane ecclesie immediate subiecta per nostre providentie ministerium viris committantur idoneis, qui sciant, velint et valeant ecclesias et monasteria ipsa eis commissa studiose regere et feliciter gubernare. Dudum siquidem ... etc. usque diligentem, demum ad te, predicti monasterii monachum et in sacerdotis constitutum ... direximus oculos nostre mentis.||
Quocirca discretioni tue per apostolica scripta mandamus, quatinus impositum tibi a Domino onus regiminis eiusdem monasterii suscipies reverenter, sic te in eius cura fideliter exercenda diligentem exhibeas et etiam studiosum, quod dictum monasterium fructuoso administratori gaudeat se commissum, tuque preter eterne retributionis premium nostram et dicte sedis benedictionem et gratiam exinde uberius consequi merearis. Datum Rome apud Sanctos apostolos IIII. Idus Ianuarii, pontificatus nostri anno octavo.