Capitulum ecclesie Iauriensis omnibus Christifidelibus presentibus pariter et futuris presencium noticiam habituris salutem in omnium Salvatore. Ad futuram rei memoriam solet humana providencia rerum in tempore gestarum seriem, ne pariter cum tempore prolabantur et ab hominum concidant memoria, scripturarum testimonio solidare posterisque literis mandare simulque traducere munimento. Proinde ad universorum tam presencium quam futurorum noticiam harum serie volumus pervenire, quod nos ad instanciam et legitimam peticionem reverendi domini Mathei abbatis monasterii Sancti Martini Sacri Montis Pannonie et conventus loci eiusdem ad audiendam infrascriptam fassionem nobilis Iohannis de Bedeghe, filii quondam Dominici Bedeghey ex nobili quondam domina Anna, filia olim nobilis Petri de Zemere procreati nostri in presenciam nimiam suam propter senectutem, oculorumque suorum caliginem personaliter venire nequeuntis, duos ex nobis videlicet venerabilem et honorabilem magistros Andream de Henye, archidiaconum Mosoniensem et Iohannem Tandalo, socios et concanonicos nostros duximus transmittendos. Qui tandem exinde ad nos reversi nobis concorditer retulerunt eo modo, quomodo ipsi in festo Apparicionis Beati Michaelis archangeli proxime preterito [1504. máj. 8.] ad possessionem Nagh Ech, consequenter domum et curiam dicti Iohannis Bedeghey in eadem habitam accessissent, ibidemque idem Iohannes Bedeghey coram dictis nostris testimoniis personaliter constitutus sponte et libere animoque bene deliberato confessus extititit eo modo, quomodo ipse volens de mamona iniquitatis amicos sibi constituere terrenaque in celestia ac transitoria in perpetua felici commercio commutare, quandam sessionem dicti condam Petri de Zemere avi sui nobilitarem ac octo sessiones iobbagionales in prefata possessione Nagh Zemere in comitatu Iauriensi in uno ordine a plaga aquilonari existentes habitas in et ad prefatum Iohannem Bedeghey tanquam superstitem et heredem legittimum per defectum seminis dicti quondam Petri Zemere condescensas et devolutas simul cum cunctis earundem utilitatibus et pertinenciis quibuslibet, terris videlicet arabilibus, cultis et incultis, agris, pratis, pascuis, fenetis, silvis, rubetis, memoribus, aquis, fluviis, piscinis, piscaturis aquarumque decursibus, vineis vinearumque promontoriis, akonibus, muneribus et moncium commoditatibus, generaliter vero quarumlibet utilitatum integritatibus quovis nominis vocabulo vocitatis ad dictam sessionem nobilitarem octoque sessiones iobbagionales rite et legitime spectantibus et pertinere debentibus dicto monasterio Sancti Martini in monte supta Pannoniam sito, fratribusque in eodem sub regulari observancia Deo iugiter militantibus, necnon quartam puellarem dicte domine Anne matris sue ex integra et totali possessione Nagh Zemere predicta eidem iuxta regni consuetudinem provenire debentem in ipsum Iohannem similiter devolutam predicto monasterio Sancti Martini eiusdemque monasterii fratribus presentibus et futuris pro dictorum Petri Zemere avi ac Anne matris ipsiusque Iohannis Bedeghey animarum salute et refrigerio pro perpetua elemosyna dedisset, donasset et contulisset, imo dedit, donavit et contulit coram dictis nostris testimoniis iure perpetuo et irrevocabiliter tenendas, possidendas pariter et habendas, nullam ius nullamve iuris et domini proprietatem sibi ipsi in iam fata sessione nobilitari octoque sessionibus iobbagionalibus ac quarta puellari per amplius reservando, sed id et eundem in dictum monasterium Sancti Martini ac fratres in eodem degentes transferendo pleno iure. In cuius rei testimonium presentes literas nostras privilegiales pendentis et autentici sigilli nostri munimine roboratas eidem monasterio Sancti Martini ac fratribus in eodem degentibus ad fassionem dictorum sociorum et concanonicorum nostrorum duximus concedendas. Datum in predicto festo Beati Michaelis archangeli, anno Domini MDIV. [1504. máj. 8.]