Nos Laurencius dux de Wylak recognoscimus et fatemur per presentes, quod nos viginti et unum pecora populorum et iobagionum reverendi domini Mathei archiabbatis ecclesie Sancti Martini Sacri Montis Pannonie in possessione eiusdem Isthwand vocata commorancium alias per homines et familiares nostros abducta, in festo nativitatis Beati Ioannis Baptiste proxime venturo [1504. jún. 23.] eisdem populis et iobagionibus dicti archiabbatis reddere et restituere, insuperque pro dampnis et iniuriis eorundem populorum ipsius domini Mathei archiabbatis per prefatos homines et familiares nostros eisdem illatis et patratis, scilicet pro expensis eiusdem domini archiabbatis previa racione factis, coram sex probis et nobilibus viris, per nos et dictum dominum archiabbatem equali numero eligendis in oppido Thapolcza vocato in termino per ipsos sex probos prefigendo iam fate domino archiabbati centum florenos paratis in pecuniis dare et solvere promisimus et promittimus. Preterea prefati populi et iobagiones dicti domini archiabbatis in predicta possessione sua Isthwand conmorantes pecudes et pecora ipsorum in terris et pascuis nostris semper libere et pacifice et sine impedimento aliquali dapasci valeant atque possint ita tamen, quod iidem populi et iobagiones ipsius domini archiabbatis de pecoribus et pecudibus ipsorum in terris sew pascuis nostris depascendis censum ab antiquo consuetum semper debito tempore eo ordine videlicet, ut de singulis pecoribus singulos quattuor denarios per anni circulum, quorum medietatem, hoc est duos denarios in singulis festivitatibus Beati Georgii martyris ac reliquos alios duos denarios in festivitatibus Beati Michaelis archangeli castellano castri nostri Zegligeth vocati per nos pro tempore constituto aut hominibus eiusdem dare et solvere debeant et teneantur. Si autem ipsi populi in dicta Isthwand commorantes easdem terras nostras pacifice uti et possidere nollent, huiusmodi censum consuetum solvere recusarent quoquomodo, ex tunc presentes litere nostre ipsis populis in hac parte concesse nullius sint vigoris et roboris. Preterea dum prefatus dominus Matheus archiabbas ex parte prefatorum iobagionum suorum nunc erga ipsum habitorum in facto iniuriarum, dampnorum et actuum potenciariorum per ipsos populos hominibus et iobagionibus nostris tempore suo patratorum et commisorum coram predictis sex probis viris termino et loco in predictis iudicium et iusticiam ac tandem ex parte populorum suorum, si qui in iudicio convicti et condempnati fuerint, in terminoque per eosdem sex probos superinde prefigendo satisfaccionem fecerit et impenderit, ex tunc nos dicto domino archiabbati, scilicet hominibus et iobagionibus suis universis literas expeditorias superinde dare tenebimur et sumus obligati harum nostrarum vigore et testimonio literarum mediante, quas sigillo nostro, quo utimur, muniri et consignari fecimus. Datum Bude in festo Ascensionis Domini, anno eiusdem MDIV. [1504. máj. 16.]