(C)apitulum ecclesie Wesprimiensis omnibus Christi fidelibus, presentibus pariter et futuris, presencium continenciam habituris, salutem in salutis largitore. Ad universorum noticiam harum serie volumus pervenire, quod cum nos honore, quo decuit, receptis litteris magnifici viri comitis Symonis de Rozgon, iudicis curie regie, adiudicatoriis pro religioso viro, domino fratre Demetrio, abbate ecclesie Thykoniensis, contra Briccium, filium Ffarcasii, et Ladislaum, filium Nicolai de Araach, confectis, nobis amicabiliter directis, iuxta earundem continenciam unacum magistro Georgio de Bokod, curie regie notario, per ipsum comitem Simonem ad subscripta specialiter transmisso, nostros homines, videlicet discretos viros, dominum Benedictum, chori eiusdem ecclesie nostre prebendarium et magistrum altaris Beati Petri apostoli, in dicta ecclesia nostra constructi, pro parte prefati domini Demetrii abbatis actoris, et magistrum Thomam Sancte Affre, socium et concanonicum nostrum, pro parte dictorum in causam attractorum pro nostris testimoniis fidedignos duxissemus destinandos, demum iidem exinde ad nos reversi nobis concorditer retulerunt, ut predictus homo regius simulcum eisdem nostris testimoniis octavo die quindenarum festi Beati Iacobi apostoli proxime preteriti [1410. aug. 15.] et aliis diebus ad id aptis et sufficientibus ad faciem possessionis Araach vocate et per consequens porcionum possessionariorum parcium in eodem existencium, vicinis et commetaneis suis universis inibi legittime convocatis et partibus presentibus, accedendo eandem eomodo divisissent,||
quod primo ultra viam magnam, qua de valle aquillonari per medium ipsius possessionis Arach itur versus meridiem ad Balatinum, ab occidente a domo seu sessione curie Pauli villici, in fine commorantis, incipiendo usque finem meridionalem, et tandem ipsam viam contra orientem saliendo declivi modo ad angulum orientalem cimiterii ecclesie ipsorum parochialis fundate ibidem, et deinde ad aquillonem ad quoddam fossatum, prope dictum cimiterium ab aquillone de novo pro meta positum, cum funiculis decem et octo mensurarum, ad longitudinem ianue ecclesie ipsorum parochialis predicte dispositarum et ordinatarum, viginti unum, decem videlicet et novem pro locis sessionalibus, in dictis litteris prefati comitis Symonis adiudicatoriis contentis, ac duo pro particularibus porcionibus empticiis, similiter litteris adiudicatoriis in eisdem specificatis, eidem domino abbati et suo conventui, ab ipso autem fossato ad domum lapideam ipsorum nobilium in causam attractorum, de qua ad aquillonem ad molendinum penes sessionem curie Georgii fabri decurrens vergendo, cuius scilicet sessionis ipsius Georgii fabri medietas orientalis (!) ad aliam possessionem dictorum nobilium in causam attractorum, Magare vocatam, alia vero medietas ab oriente (!) ad dictam possessionem Arach pertinerent; deinde ad occidentem declinando usque predictam viam magnam cum predicto funiculo decem et octo mensurarum sex pro locis sessionalibus predictis nobilibus. Quelibet autem horum locorum sessionalium, tam ipsi domino abbati, quam prefatis nobilibus deventorum, longitudo et adiacencia ortorum eorundem triginta sex mensuras, ad longitudinem ianue predicte ecclesie parochialis pensatas, latitudo siquidem decem et octo mensuras in se continent. Ceterum de terris arabilibus octoaginta tria iugera, quinquaginta videlicet septem ultra rivulum, de dicta valle orientali ad Balatinum fluentem, in fine vinearum penes dictum Balatinum, ac sex a fine orti predicte domus lapidee versus meridiem adiacencia, et reliqua viginti penes dictum fluvium ad dictum Balatinum decurrencia et ab aliis terris occidentalibus fossatis metalibus distinguencia; preterea quinquaginta duas vineas penes viam magnam, de Fyred ad dictam possessionem Arach venientem, a meridie et aquillone usque duo fossata pro metis de novo fodita; postmodum autem prata seu fenilia ipsorum ad viginti quinque mensuras connumerando, sex mensuras earundem ab aquillone ad dicta sex loca sessionalia applicando prefatis nobilibus in causam attractis, residuitates enim ipsarum terrarum arabilium, vinearum et fenilium similiter ad predicta viginti unum loca sessionalia annectendo, predicto domino abbati et suo conventui restatuissent et commisissent iugiter et in evum, salvis nostris et aliorum iuribus, possidenda, prescriptum fluvium aque communi usui parcium relinquendo. Item iuxta predictum fossatum, in angulo aquillonari cimiterii predicte ecclesie parochialis inter loca sessionalia dictorum domini abbatis et sui conventus ac predictorum nobilium, ut premittitur, pro meta positum, ad pretactum fluvium aque viam pro communi usu partibus volentibus fieri disposuissent et fines terrarum arabilium ab aquillone iuxta dictam viam ad ortum predictorum nobilium et iobagionum eorundem pertinere commisissent. Datum quin(to)decimo Kalendas mensis Augusti, anno Domini millesimo quadringentesimo undecimo. [1411. júl. 18.] Actum per manus honorabilis viri magistri Georgii lectoris prefate ecclesie nostre, honorabilibus et circumspectis viris dominis Briccio preposito ia[mdicte] ecclesie nostre, Gregorio cantore, Ladislao custode et magistro Iohanne de Dombnicha decano et canonico prefate ecclesie nostre existentibus.