Ladislaus, Dei gracia Hungarie, Bohemie, Dalmacie, Croacie etc. rex Austrieque et Stirie dux, necnon marchio Morauie, fidelibus nostris capitulo ecclesie. Vesprimiensis salutem et graciam. Noveritis, quod nobis in festo Beate Lucie virginis [1453. dec. 13.] Bude unacum dicti regni nostri Hungarie baronibus et nobilibus pro faciendo moderativo iudicio causantibus, in sede nostra iudiciaria sedentibus, religiosus frater Ladislaus abbas ecclesie Tykoniensis personaliter nostram specialem veniendo in presenciam, quasdam tres litteras, unam condam domini Sigismundi imperatoris et regis evocatoriam, vobis loquentem, et aliam vestram exinde relatoriam, ac terciam eiusdem domini Sigismundi imperatoris et regis iudicialem, necnon quedam paria litterarum eiusdem prorogatoriarum, in diversis terminis et annis infrascribendis emanatas et confecta, nostre speciali presencie presentavit, declarantes,||
I. quod magnificus Georgius de Rozgon comes Posoniensis ad legittimam peticionem religiosi viri domini, domini fratris Michaelis abbatis monasterii de dicto Tykonio unacum Valentino, litterato, regio, ac Laurencio similiter litterato de Salamonfalwa, capituli Albensis hominibus Iosam de Path hominem suum ad infrascriptam possessionariam recaptivacionem et statucionem faciendas de congregacione sua generali universitatis nobilium et alterius status comitatus Vesprimiensis hominum, quintodecimo die festi Beati Iacobi apostoli de speciali mandato ipsius domini Sigismundi regis in anno Domini Mo CCCCo tricesimo sexto [1436. aug. 8.] prope villam Wasarhel celebrata destinasset. Tandem iidem exinde ad suam congregacionem ad ipsum reversi, uniformiter retulissent, ut ipsi feria quarta proxima ante festum Beati Bartholomei apostoli tunc elapsi, [1436. aug. 22.] quintodecimo scilicet die ipsius congregacionis sue, ad faciem cuiusdam predi(i) Zewles vocati, nunc habitatoribus destituti, in predicto comitatu Vesprimiensi inter possessiones Wasarhel predicta ac Naghzewles et Somlio, a parte occidentali existentis, presentibus vicinis et commetaneis accedendo, dum idem predium nomine iuris predicti monasterii de Thykonyo consequenterque ipsius fratris Michaelis abbatis eiusdem monasterii legittime recaptivando cum suis utilitatibus et pertinenciis, puta terris arabilibus, pratis, silvis et vinearum montibus ceterisque quibuslibet appendiciis, eidem fratre (!) Michaeli abbate (!) nemine in ibi contradicente statuissent. Ipso itaque Georgio comite ipsorum regis ac sui et capituli Albensis hominum huiusmodi relacione, de premissis facta, percipiendo, et eius seriem prefati universitati nobilium prescripti comitatus in ipsa sua congregacione, prout moris est, provulgari faciendo: Nicolaus et Iohannes de Wesen ipsi personaliter adherentes, huiusmodi statucioni antefati predii, memorato fratri Michaeli abbati facte, contradixissent. Cuius quidem contradiccionis racionem ipso fratre Michaele abbate per ipsos Nicolaum et Iohannem assignari coram prefato Georgio comite postulante, iidem Nicolaus et Iohannes respondissent, ut ipsi pro eo fecissent contradiccionem prenotatam, quia prefatum predium Zewles vocatum ipsis vigore instrumentali pertineret, que non ad tunc in prescripta congregacione, sed in termino ulteriori, per ipsum Georgium comitem eis dando, in curia regia exhiberent. Unde ipse unacum iudicibus nobilium ac iuratis assessoribus ipsius sue congregacionis iudicans commisisset eomodo, ut predicti Nicolaus et Iohannes predicta eorum litteralia instrumenta, si que in facto dicti predii haberent confectam, in octavis festi Beati Michaelis archangeli tunc venturi [1436. okt. 6.] in curia regia sueque regie maiestatis personali in presencia exbibere tenerentur.||
Ad quas quidem [octavas] festi Beati Michaelis archangeli, quia prefatus Nicolaus, absque cuius scilicet presencialitate presens causa decidi nequivisset et terminari, per Benedictum de Wazol, legittimum procuratorem dicti domini abbatis, in person[a eiusdem] congruis diebus ipsarum octavarum coram personali presencia dicti domini Sigismundi regis expectatus, in eiusdem personalem presenciam non venisset, neque misisset, sed se mediantibus aliis litteris eiusdem iudicia[libus] exinde confectis in iudicio agravari permisisset, et ob hoc idem Nicolaus, petente prefato procuratore dicti abbatis, ad premissa evocari debuisset, pro eo ipse dominus Sigismundus rex premissam instrumentalem exhibicionem inter actorem ab una et inter antefatum Iohannem, in causam attractum, parte ab altera ad octavas festi Epiphaniarum Domini tunc venturi [1437. jan. 13.] prorogans, fidelitati vestre firmiter percipiendo mandasset, quatenus vestrum mitteretis hominem pro testimonio fide dignum, quo presente homo suus infra declarandus mencionatum Nicolaum de Wesen premissa litteralia sua instrumenta exhibiturum ac de iudicio trium marcarum iudici et parti adverse satisfacturum contra annotatum fratrem Michaelem abbatem ad octavas festi Epiphaniarum Domini tunc venturi suam regiam personalem evocaret in presenciam, et post hec ipsius evocacionis seriem cum nomine evocati ad easdem octavas sue personali presencie fideliter rescriberet.||
A quibus quidem octavis, dum ipsa instrumentalis exhibicio partes inter easdem serie litterarum eiusdem domini Sigismundi regis prorogatoriarum ventilando ad octavas festi Beati Michaelis archangeli in anno Domini Mo quadringentesimo tricesimo septimo preteritas [1437. okt. 6.] prorogative devenisset.||
2. Tandem ipsis octavis instantibus prefatus Benedictus de Wazul pro annotato fratre Michaele abbate cum procuratoriis litteris conventus ecclesie Simigiensis in eiusdem domini Sigismundi regis veniendo personalem presenciam, litteras vestras super ipsa evocacione rescripcionales eidem sue personali presencie presentasset. In quibus per Petrum de Chygler suum ac honorabilem virum magistrum Lucam de Zenthanthalfalwa, socium et concanonicum vestrum, vestrum homines sabbato proximo ante festum nativitatis Domini, in dicto anno Domini millesimo quadringentesimo tricesimo septimo (!) preteritum [1436. dec. 22.] prefatum Nicolaum de Wesen in porcione sua possessionaria, in possessione Chepel vocata habita, ad premissa contra annotatum fratrem Michaelem abbatem ad dictas octavas festi Epiphaniarum Domini ipse dominus Sigismundus imperator et rex suam personalem in presenciam legittime evocatum comperisset manifeste.||
3. Ad quas quidem octavas prefati festi Beati Michaelis archangeli [1437. okt. 6.] prefatus Iohannes de Wesen, absque cuius scilicet presencialitate presens causa decidi nequivisset et terminari, per prefatum Benedictum de Wazul, legittimum procuratorem dicti domini abbatis, in persona eiusdem congruis diebus ipsarum octavarum coram personali [presencia dicti] domini regis expectatus, eiusdem in presenciam non venisset, neque misisset, sed se mediantibus aliis litteris iudicialibus exinde confectis in iudicio agravari permisisset, et ob hoc idem Iohannes, petente prefato procuratore dicti abbatis, ad premissa evocari debuisset, pro eo premissam instrumentalem exhibicionem inter annotatum actorem ab una et inter prefatum Nicolaum, in causam attractum parte ab altera ad octavas festi Epiphaniarum Domini tunc venturas [1438. jan. 13.] prorogando, fidelitati vestre mandasset, quatenus vestrum mitteretis hominem, pro testimonio fide dignum, quo presente homo suus regius infra declarandus memoratum Iohannem de Wesen premissa litteralia sua instrumenta exhibiturum ac de iudicio trium marcarum iudici et parti adverse satisfacturum contra annotatum Michaelem abbatem ad dictas octavas festi Epiphaniarum Domini tunc venturas suam regiam personalem evocaret in presenciam; et post hec ipsius evocacionis seriem cum nomine evocati ad easdem octavas sue personali presencie fideliter rescriberetis.||
Tandem ipsis octavis festi Epiphaniarum Domini instantibus prefatus Benedictus de Wazul pro antefato fratre Michaele abbate cum procuratoriis litteris vestris in eiusdem domini Sigismundi regis veniendo personalem presenciam, litteras vestras super ipsa evocacione eidem personali presencie dicti domini Sigismundi regis presentasset. In quibus per Petrum de Chygler, suum, ac honorabilem magistrum Gallum de Vyfalw, socium et concanonicum vestrum, vestrum homines feria tercia proxima ante festum Beati Thome apostoli in dicto anno Domini millesimo quadringentesimo tricesimo septimo preterita [1437. dec. 17.] prefatum Iohannem de Wesen in porcione sua possessionaria, in dicte possessione Chepel vocata habita, premissa litteralia sua instrumenta exhibiturum ac de dicto iudicio trium marcarum iudici et parti adverse satisfacturum contra annotatum fratrem Michaelem abbatem legittime evocatum fore comperisset manifeste.||
Ad quas quidem octavas festi Epiphaniarum Domini prefatus Iohannes de Wesen per antefatum procuratorem dicti domini abbatis in persona eiusdem congruis diebus ipsarum octavarum coram personali presencia prefati domini Sigismundi regis expectatus, eiusdem personalem in presenciam non venisset, neque misisset, nec persolvisset iudicium prenotatum, sed se mediantibus dictis litteris eiusdem iudicialibus exinde confectis, pro sua non veniencia in iudicio consueto et pro non solucione dicti iudicii in duplo eiusdem agravari per[misisset].||
Quibus presentatis [1453. dec. 13.] prefatus frater Ladislaus abbas allegavit eo modo, quod prescripta causa partes inter predictas quodammodo condescensa extitisset, medio eciam tempore prefati Nicolaus et Iohannes ex hoc seculo decessissent ... dicta instrumentalis exhibicio in Ladislaum filium dicti Nicolai condescensa extitisset. Unde, si iuri consonaret et equitati videretur, extunc ipse antefatum Ladislaum premissas litteras suas exhibiturum in tribus foris conprovincialibus in eandem nostram specialem in presenciam legittime faceret proclamari. Et quia idem Ladislaus ad premissa proclamandus fore videbatur, pro eo fidelitati vestre mandamus, quatenus vestrum mittatis hominem pro testimonio fide dignum, quo presente Mauricius vel Georgius, filii Blasii de Wamus, sin Paulus sew Nicolaus Kakas de Hydekwth sive Laurencius de Chathar aliis absentibus homo noster memoratum Ladislaum, filium Nicolai, premissa litteralia sua instrumenta exhibiturum ac de iudiciis novem marcarum iudici et parti adverse satisfacturum contra prefatum Ladislaum abbatem de Thykonyo ad octavas festi Beati Georgii martiris (nunc venturas) [1454. máj. 1.] in tribus foris conprovincialibus publice et manifeste nostram (specialem) faciatis proclamari in presenciam, insinuando ibidem (eidem), ut si venerit et premissa sua litteralia instrumenta exhibuerit, de dictis quoque iudiciis iudici et parti adverse satisfecerit, bene quidem; alioquin non obstante ipsius absencia et rebellione, finem faciemus causa in premissa, prout dictabit ordo iuris. Et post hec ipsius terne forensis proclamacionis seriem cum nomine(-ibus) proclamati(-torum) ad easdem octavas eidem nostre speciali presencie fideliter rescribatis. Datum Bude tercio die termini prenotati, anno Domini millesimo quadringentesimo quinquagesimo tercio. [1453. dec. 15.]||
Külzetén: Fidelibus nostris capitulo ecclesie Vesprimiensis pro religioso fratre Ladislao abbate ecclesie Thykoniensis contra Ladislaum de Vesen ad octavas festi Beati Georgii martiris.||
Hátán: Exsecucio proclamacionis facta est in tribus puplicis foris, prima videlicet feria quarta proxima post festum Gregorii pape [1454. márc. 13.] in foro Wesprimiensi, secunda proclamacio in dominica proxima sequenti [1454. márc. 17.] in Berenhida, tercia feria secunda [1454. márc. 18.] in Leweld; homo regius Georgius dictus Ffarkas de Wamus, noster (homo) magister Paulus de Rekas.