Nos conventus crucifferorum domus hospitalis ecclesie beati regis Stephani de Alba memorie commendamus per presentes, quod reverendus in Christo pater dominus Iohannes, Thandallo dictus, abbas monasterii ecclesie Sancti Aniani martiris (!) de Tykonio, nostram personaliter veniendo in presenciam, exhibuit nobis et presentavit quasdam litteras serenissimi principis condam domini Andree, Dei gracia regis Hungarie, tenoris infrascripti, patenter in pargameno confectas, sigillo eiusdem domini Andree regis, ut in certa parte bene apparebat, in dorso consignatas, petens nos idem dominus Iohannes abbas, ut easdem de verbo ad verbum sine ulla diminucione et augmento aliquali transscribi litterisque nostris inseri facere et eidem iuris sui et ecclesie sue prefate ad cautelam dare dignaremur. Quarum tenor est talis:||
Nos Andreas, Dei gracia rex Hungariae, significamus, quibus expedit, universis presencium per tenorem, quod, quia pium est et salubriter convenit regibus ac principibus ecclesiis Dei provisionem facere congruentem, nos ad instanciam et peticionem religiosi viri fratris Regnoldi, abbatis monasterii nostri Tyconiensis, terram Pasca, filii Gyurgus, wduornici nostri de Fyured, sitam inter terras eiusdem monasterii nostri, in territorio dicte ville Fyured iuxta Balatinum in comitatu Zaladiensi existentes, cum omnibus utilitatibus et pertinenciis suis universis, vineis scilicet et aliis, dedimus, donavimus et contulimus eidem monasterio nostro iure perpetuo et inrevocabiliter possidendam. Et cum presentes nobis fuerint reportate, nostrum eciam super hoc eidem monasterio nostro privilegium concedemus. Datum Bude in dominica proxima post festum Sanctorum Wyti et Modesti, anno Domini Mo CCo nonagesimo octavo. [1298. jún. 22.]||
Unde nos peticionibus dicti domini Iohannis abbatis tanquam iustis et legitimis favorabiliter inclinati, prescriptas litteras non abrasas, non cancellatas nec in aliqua sui parte suspectas, sed prorsus omni vicio et suspicione carentes, de verbo ad verbum sine diminucione et augmento aliquali presentibus litteris nostris inseri et transsumpmi faciendo, eidem domino abbati iurium eiusdem et ecclesie sue prefate ad cautelam, communi iusticia requirente, duximus concedendas. In cuius rei testimonium firmitatemque perpetuam presentes litteras nostras pendenti et autentico sigillo nostro maiore communitas dedimus. Datum feria tercia proxima post festum exaltacionis Sancte Crucis, anno Domini millesimo quingentesimo vigesimo secundo. [1522. szept. 16.]