Allerdurchluchtigster kunig allergnedigister liebster herre. ||
Euwer kuniglichenn maiestatenn sey meyn armer dienst unnd kleyne vermeigenheyt allezeit zuvor. Allergnedigister kunig unnd herr: Ich pitt euwer koe(nigliche) m(ajes)t(ät) mit gnaedenn zuverniemen, das wie ich von zeit meyner angefahenden nemelich des messermacher amptz ain zeichenn als euwer koe(niglichen) m(ajes)t(ät) hierpey abgesettz mit gnaeden zuvermerckenn habenn in gutter roi sunder jemandtz inbruch oder vermeynter gerechtickait biß auf diesenn heutigenn dag. In ghainem taill nit anders, dan wie sich der redelicheyt nach gezymmen moege, gebraucht unnd geslaegenn habe, unnd uf das Ich dann mit sampt meynen erbenn sunder unpillige indracht eyniger unnss amptz mitgenossenn oder sunst durch unnd so weit die deutsche nation strecken die restlichen gebrauchenn. Unnd des ouch hernaemaels weiter unwille unnd inbruch desshalbenn verhoit werdenn moige. So pit Ich so oitmoitlichste kan oder vermag euwer koe(nigliche) m(ajestä)t als meynen aller - gnedigstenn herren das dieselbige euwer koe(nigliche) m(ajesstä)t mir so gnedich synn unnd mich mit sampt meynen nachkoemelingen mit dem selbigen messerzeichenn gnedicklich confirmeiren, hanthabenn unnd befestigen wollenn, daemit Ich mich unnd die meyne, wanne es noit gepurenn wurt, hettenn zuverdatingen sulchs will. Ich nebenn verpflichter gehoresamheyt die zeit meyns liebens mit meynem armen dienste unnd innighem gepete zuverdienenn nidermer vergessenn umb dieselbige euwer koe(niglicher) m(ajestä)t die der almechtige Got aller cristenheyt zu heill unnd troist, unnd dem thuirkenn zu wiederwerdickeyt zo langen zeitenn in kuniglichem regimente froelichen in gluckseligem regimente gefristenn wille. ||
E(urer) k(öniglichen) M(ajestä)t ||
unnderthenigst ||
Hayrich, messermacher und burger zu Coelne||
||
verso: fiat, doch das er kuntschaft pring, das sich sunst niemands dises zaichens prauche. ||
||
Transkription: Peter Peusquens