(Chrismon.) In nomine sanctae et indiuiduae trinitatis. Karolus diuina favente clementia Imperator Augustus. si circa seruos dei beneficia largimur oportuna, non solum imperialem modum decenter Implemus, uerum etiam eternae beatitudinis premium nos promereri Inde liquido credimus. Quapropter notum sit omnibus fidelibus sanctae dei ecclesiae nostrisque, scilicet presentibus et futuris, quoniam quidam uir uenerabilis et religiosus abba noster nomine Hitto tradidit simul cum aduocato suo otilone ad sanctum michahelem sanctumque dei martyrem emmerammum proprietatem suam, quam habuit in oriente iuxta fluuium, qui uocatur raba, Id est hobas XXX. in manum ambriconis uenerabilis epicopi (sic) et aduocati eius gundperti, Econtra uero prefatus uenerabilis episcopus manibus aduocatorum suorum una cum consensu totius cleri sibi subiecti tradidit ei in proprietatem possidendam usque in finem uitae suae de rebus Sancti emmerammi abbatiam, quae nuncupatur laculunensem, cum omnibus adiacentiis suis, id est cum ecclesiis quam ceteris aedificiis, mancipiis utriusque sexus, terris cultis et incultis, pratis, pascuis, siluis, aquis, aquarumue decursibus, mobilibus et immobilibus seu quicquid ad haec iuste et legitime pertinere uidebantur. Sed ob firmitatis graciam idem hitto religiosus abba nostram deprecatus est celsitudinem, ut praeceptum liberalitatis nostrae super hoc adderemus. Nos autem libentissime petitionibus illius satisfacientes iubemus atque decernimus, ut ab hodierno die et deinceps iam dictam abbatiam cum locis ibi pertinentibus usque ad finem uitae suae habeat, teneat atque possideat Eo etiam tenore, ut post obitum suum praefatae res In omnibus saluae ad sanctum emmerammum reuertantur nullo umquam hanc conuenientiam irrumpente uel inquietante, sed deo auxiliante perpetuis temporibus firma et inuiolabilis permaneat. Et ut haec auctoritas praeceptionis nostrae firmior habeatur et per futura tempora uerius credatur ac diligentius conseruetur, manu propria nostra subter eam confirmauimus et bullae nostrae impressione sigillari iussimus. Signum Domni Arnolfi (Monogramma) Serenissimi regis. Signum domni Karoli (Monogramma) serenissimi Imperatoris Augusti. Uualdo Cancellarius ad uicem Liutuuardi archicancellarii recognoui et ss. (S. R. cum notis tiron.) Data non. aprl. Anno incarn. domini. dccc LXXX III. Indict. I. Anno uero imperii piissimi imperatoris Karoli III. Actum regenesburg In dei nomine feliciter. Amen.

Source Fulltext: OÖUB 2 (Wien 1856), S. 25-26