In nomine sancte et indiuidue Trinitatis. Arnolfus divina ordinante clementia rex. Si locis deo dicatis vel servis dei ibidem deservientibus aliquid solatium conferre curaverimus, deum nos ob hoc propicium habere non diffidimus. Qua propter noverit omnium fidelium nostrorum presentium scilicet et futurorum industria, qualiter nos pro remedio parentum nostrorum quasdam res proprietatis nostre in pago Trungowe in loco nuncupato Rorbach, quod prius Thiechardo per preceptum donavimus, sed quia ille apostata factus est et regnum nostrum ac fideles nostros depredavit, iure et legalitate abstulimus et ad sanctum florianum martirem christi manu potenti per istud nostrum preceptum firmissime condonamus ea videlicet ratione, ut deinceps sine ullius contradictione prefate res cum omnibus iuste et legitime ibidem aspicientibus edificiis, mancipiis utriusque sexus, terris, vineis, agris, campis, pratis, pascuis, silvis, aquis aquarumve decursibus, molendinis, viis et inviis, cultis et incultis, mobilibus et immobilibus, quesitis vel inquirendis cum omni integritate ad iam dictum sanctum florianum martirem christi perpetualiter possidende permaneant nullo umquam Successorum nostrorum hoc irrumpente. Et ut hec nostra auctoritas firmior habeatur, manu propria subtus eam firmavimus et annulo nostro insigniri iussimus.||
Signum domini Arnolfi gloriosissimi regis. (Monogramma) Engilpero Notarius ad vicem Thiotmari archicapellani recognovi. Data XV. Kalendas Martii anno dominice incarnationis DCCCXCII. Indictione X. anno vero regni arnolfi piissimi regis V. acta Ottinga curte regia in Dei nomine feliciter. Amen.

Source Fulltext: OÖUB 2 (Wien 1856), S. 38-39