In nomine sanctae et individuae Trinitatis. Ego Chunradus Dei gratia sanctae Salzburgensis Ecclesiae Archiepiscopus omnibus Christi fidelibus. In excelsa constituti specla praedonum incursus providere et hiantium luporum morsus a grege summi pastoris debent arcere. Unde et nos monasticae quieti et divinae sacrarum personarum contemplationi consulentes, ne seram forte vulneratis caulis afferamus medelam in tempore statuimus occurrere. Est igitur in civitate nostra monasterium, quod beatus Rudbertus pater et patronus noster fundavit et sanctam virginem Erindrudem abbatissam sanctimonialibus inibi consecravit duxque Theodo multis reditibus (sic) ampliavit. Hujus Ecclesiae advocatia fidelem nostrum Otakarum marchionem de Styre virum tam strenuum quam discretum rogatu dilectae sororis nostrae Diemudis nunc Abbatissae inbeneficiavimus, cujus et tuitione sit monasterii possessio et discretione illesa permaneat a gravi advocatorum vexatione, subnectentes illi in mandatis et sub obtentu beneficii interminantes, ne quem suorum fidelium eadem advocatia unquam inbeneficiare sed neque ubivis locorum sine consensu praefatae Abbatissae et ejus sequacium cuiquam secundario velit assignare. Et quia praedictarum sanctimonialium orationibus nos speramus foveri, partem agelli ad Arnstorf vineis earum adjacentem et necessariam contulimus, ut centuplicatam mercedem in terra viventium recipiamus. Cunctas ad haec possessiones vel decimationes a regibus, ab episcopis, a principibus seu a quibuslibet fidelibus eis oblatas, concambiatas aut juste quoquomodo acquisitas, videlicet in Oriente Welmik, Phlaetniz, Maezilinstorf, Arnstorf, Hasilpach, Lovngoe, quod Heinricus Imperator dedit, Schalah et quidquid Radstat et Bongoe, Enstal situm est et quod Halle detinent, scilicet pontem Pühiln cum omnibus ad ipsum locum pertinentibus, quartam partem aquae in Gerhohisprete et tertiam partem aquae in Wazimannsgalgen et dimidium aquae nonae partis, quam tradidit Wezil, et octavam partem aquae in ligno, quod dicitur Herdeginsprete, et item octavam partem in eodem ligno, quatuor loca patellaria et dimidium, loca curtilia quatuor et dimidium et pratum, quod tradidit Wiso, Figun cum viculis suis, Glaese, Morzige cum decimationibus suis, Ebideshusin cum omnibus ad ipsum locum pertinentibus, Titimaenningen cum decimationibus et quidquid ad ipsum locum pertinet, quem etiam locum Regindrut regina dedit, Chamera cum curtibus et decimationibus suis, Hirzowe cum molendinis et piscationibus, Wilpuch, Eicha, Chapfs cum villulis adjacentibus, Lerch, Oste, tres vineas Priupah sitas, Haginspuch, Geppinheim, curtem Loufin sitam et si qua sunt alia, quae dinumerare longum est, culta et inculta, quaesita et inquirenda, in cadmiis, in locis salinariis, in agris, silvis, vineis, pratis, piscationibus, exitibus vel reditibus, aquarum decursibus, mancipiis, censualibus seu quidquid habent vel habiturae sunt, omnia conscriptione hac pontificali, ut rata tam praesentibus quam futuris sint, roboramus et sigilli nostri inpressione muniri decrevimus. Et cum invocatione patris et filii et spiritus sancti omniumque romanorum pontificum auctoritate, quisquis haec disturbare temptaverit, sciat se anathematis vinculo innodatum, nisi poenituerit. L. S. C. Ego Hiltpoldus Gurcensis episcopus ss. C. Ego Reginbertus abbas S. Petri ss. C. Ego Romanus praepositus S. Mariae ad zöl [?] ss. C. Ego Hadmarus Archidiaconus Frisacensis ss. Actum Frisaci V. Id. Junii Anno incarnationis domini M.C.XVII. Indict. X. Paschali II. pape sancte Romane ecclesie praesidente Anno apostolatus ejus XVII. Henrico V. Imperatore Anno regni ejus XI. Imperii autem VIII. Anno vero pontificatus nostri XII. Quod subscriptis testibus confirmamus: Engilberto duce Karinthiae, Pernhardo comite, Meginhardo comite de Go^erze, Dietmaro de Lovgoe, Eginscalco de Friesach, Eppone et Gotfrido fratre ejus de Wietingin, Eberhardo de Libnih, Alberone de Dietramingin, Oulrico, Chunrado, Reginberto de Sechirchen.

Source Fulltext: OÖUB 2 (Wien 1856), S. 150-152