In nomine sancte et indiuidue trinitatis. Liupoldus dei gratia Dux Austrie omni praesenti etiam et futurae generationi in perpetuum. Quicquid uenerabilium locorum quieti confert et tuitioni, hoc dignum est iussu principum conscribi atque memoriae hominum tenacius comendari. Ea racione presenti pagina nobis placuit annotari, Qualiter Hermannus abbas de Pomgartenberge cum fratribus suis per legitimas et publicas maiorum nostrorum conscriptiones, hoc est piae recordationis Liupoldi illustrissimi principis ac ducis Bawariae patrui nostri nobis euidenter demonstrauerunt, quod nos hereditario successionis iure eidem uenerabili loco patrocinium exhibere debemus et indefessam contra improbos protectionem. Igitur quoniam nostrae congruere non ignoramus dignitati id strenue agere, quod in nos piissimorum parentum transmisit deuotio, curae nobis non immerito fuisse dinoscitur Ottonem nobilem uirum de Klamme filium Hermanni comitis, qui praefatum monasterium usurpato patrocinandi nomine grauiter affligebat, in hoc usque iudiciario ordine adducere, ut nobis ius nostrum recognosceret et quod male usurpauerat, in manus nostras resignaret. Verum quia antedicti uiri nobilitatem honore potius augere decreuimus quam deminuere, eiusdem loci uidelicet Pomgartenberge tuitionem ei comendauimus hac sane conditione, ut solius diuinae remunerationis non alicuius temporalis commodi respectu fratrum inibi degentium antestet necessitatibus et a uariis eos prauorum tueatur oppressionibus. Quodsi abhinc, quod absit, idem Otto grauis eis aut uiolentus aliquatenus apparuerit, liberum erit omnino praedictis fratribus se ab illo penitus eximere et ad nos successoresque nostros tamquam ad legitimos patronos fiducialiter se conferre. Haec autem quatinus rata semper maneant et inuiolata, conscriptionem praesentem et sigillo nostro signari et testibus, qui interfuerunt, iudicauimus roborari. Sunt autem hii: Chonradus comes de Pilsteine et filius fratris eius Sifridus comes, Chonradus burcgrauius de Nurenberg, Liupoldus comes de Plagen, Ulricus de Asparn, Crafto de Amzinesbach, Wernherus de Griezbach, Otto de Rammesberg, Rudolfus de Vlaeze, Wichardus de Seuelde, Hademarus de Chunringen, Wichardus de Zebingen, Albertus de Pfafsteten, Lutwinus de Sunnenberg, Herbordus de Potendorf, Ulricus de Stoce, Heinricus de Imzinesdorf, Pertholdus de Arnsteine. Acta sunt haec anno ab incarnatione dominica M. C. LXXX. VIII. Indictione VI. II. Kal. Junii In Villa, quae vocatur Mutarn. Amen.

Source Fulltext: OÖUB 2 (Wien 1856), S. 410-411