In nomine sancte et indiuidue trinitatis theobaldus dei gratia patauiensis ecclesie humilis minister uniuersis christi fidelibus salutem in perpetuum amen. Cum pie desiderium uoluntatis et laudande diffinitionis intentio pastoralibus studiis semper et ubique sint adiuuanda, cura sollicitudinis est adhibenda, ut ea, que iuste ac rationabiliter pertractata fuerint, in recidiuum relabi non possint. Ea propter Heinricus uenerabilis monasterii sancti Nicolai iuxta patauiam prepositus cernens cum fratribus suis colonos suos de Goldarwerd per yconomos nostros aliquibus uanis et cassis mutacionibus et institucionibus grauari et nouis quibusdam et inusitatis exactionibus occasione iuris, quod ibidem racione institucionis habebamus, uexari, petiuit suppliciter a nobis, ut hoc ipsum iam dictum ius institucionis in remissionem peccatorum nostrorum monasterio sancti Nicolai traderemus, et saltem hoc modo perturbationes suas et colonum (sic) suorum de Goldarwerd angarias mesericorditer excluderemus. Consideratione igitur super hoc propensiori sollicitudine habita nimirum aduertentes, quoniam, cuius est possessio, eius est et institutio, iustis postulationibus H. prepositi sancti Nicolai et fratrum suorum uidentes angustias animarum suarum et suspiria, que ob fugam colonum predicti loci altius trahebant, misericordia moti de consilio et coniuentia chori patauiensis annuimus et ius institutionis, quod in prefato predio habere uidebamur, super altare S. Nicolai cessante omni contradictione manu potestatiua delegauimus. Illi autem utpote uiri religiosi nolentes ingrati existere talis beneficii sibi per nos collati ducti spontanea bonitate sua post obitum nostrum anniuersarium nostrum celebrare oracionibus et elemosinarum largitionibus instituerunt. Ceterum ne per insolentiam et obliuionem hominum id, quod tam racionabiliter a nobis actum est, aboleri ualeat, presentis scripti paginam inpressione sigilli nostri conmunimus et testimonio eorum, quorum nomina infra continentur, corroboramus. Taegno decanus, Ulricus prepositus de Ardacker, Purchardus de Chambe, Meingotus archidiaconus, Wernherus prepositus de mathse, Meinhalmus archipresbiter, Chunradus canonicus, Richerus notarius, Chunradus de Roeth, Dietricus et frater eius Heinricus de po^ungarten, Waltherus de tannenberge, Rickerus de wesen, Uvernhardus de mortspach, Levtoldus de sauersteten, Ru^odolfus marschalcus curie, Gotfridus camerarius, Albrandus, Dietmarus, Albertus, Heinricus, Erckengerus, UVernhardus, UValtherus. Actum feliciter Anno M.C.LXXX.VII.

Source Fulltext: OÖUB 2 (Wien 1856), S. 406-407