In nomine sancte et indiuidue trinitatis. Theobaldus dei gracia Patauiensis episcopus vniuersis christi fidelibus imperpetuum. Cum pie desiderium uoluntatis et laudande diffinicionis intencio pastoralibus studiis semper sint iuuanda, cura sollicitudinis est adhibenda, ut ea, que iusta et legittima conuencione pertractata fuerint, in recidiuum relabi scrupulum non possint. Ea propter omnibus christi fidelibus innotescere uolumus, quomodo Gotescalcus Walthusensis prepositus una cum consensu fratrum suorum possessiones, quecunque in Lungov ecclesie Walthusensi attinebant, tam cultis quam incultis, quesitis et inquirendis, molendinis, molendinorum locis, aquis aquarumque decursibus, exitibus et reditibus, agris, pratis, siluis, pascuis montanis et planis, cum mancipiis omnique integritate iuris, quo eadem predia sue ex antiquo pertinebant ecclesie, Gundachero Salzburgensi preposito et eiusdem ecclesie choro imperpetuum libere ac quiete possidendas pro centum et decem marcis frisacensis monete uendiderit atque tradiderit, salubri super hoc habita deliberatione, ut ex eodem precio uiciniora et comodiora predia sue conquireret ecclesie. Hanc igitur prouidenciam utriusque partis utilem prospicientes, quia walthusensis ecclesia cum omni iure suo Patauiensi, cui licet inmeriti presidemus, integraliter attinebat et eo respectu sine auctoritate nostra predicta uendicio rata plenarie haberi non poterat, nos utrique parti prouisum esse cupientes inposterum ad peticionem predictorum Gundacheri Salzburgensis et Gotscalci walthusensis prepositorum de consensu et coniuencia tocius chori nostri pretaxatam uendicionem auctoritate nostra corroborantes tam manu nostra quam aduocati Walthusensis ecclesie Ottonis comitis de velburch prenominatas possessiones in Lungov sitas eidem Gundachero preposito et ecclesie sue choro potestatiue delegauimus. Hiis sane tam congruo racionis moderamine peractis contigit quosdam walthusensis ecclesie fratres simul cum sororibus cassa plenitudinis mobilitate super uendicione eorundem prediorum intensius turbari ac sepenumero dictam conuencionem in irritum a nobis reuocari instanter postulare. Illorum itaque inconsiderati ausus importunitati quamquam usus et equitatis censura prorsus esset contraria, nostri tamen interuentu consilii prememoratus Salzburgensis prepositus suorum assensu fratrum uoluntati nostre consuetus satisfacere, marcas XV frisacensis monete, ut omnium sibi in hoc negocio detrahencium excluderet liuorem, walthusensi preposito et ecclesie sue collegio una cum cypho argenteo superaddidit ac demum tocius congregacionis tam clericorum quam fratrum conuersorum et sanctimonialium walthusensis ecclesie obtento in predicta uendicione consensu factum ipsum roborari nostroque iure ac beniuolencia peciit consummari. Nos ergo debitum nostre deuocionis circa Salzburgensem sedem attendentes ipsius karissimi nobis in christo amici Gundacheri prepositi et ecclesie sue chori precibus libenti animo consensimus et ne pretaxata uendicionis series ullo deinceps retractari ualeat ingenio, presentis pagina scripti sigilli nostri munimine signata confirmare dignum duximus. Ne quid preterea ingeniosus liuor ad sue prauitatis comentum hac parte inueniat, testes ex ordine placuit conscribere. Horum hec sunt nomina: Manegoldus abbas de Chremsmunsture, Otto prepositus patauie, Tagino decanus, Burchardus de Chambe, O^udalricus prepositus de Ardacher, Megingotus archidiaconus, Wernherus prepositus de Matse, Meginhalmus plebanus patauiensis, Richerus prothonotarius, Patauienses canonici. Rodmarus abbas de Chotwich, Chonradus abbas de Medelich, Wintherus abbas de Altenburch, Perhtoldus prepositus sancti Georij, Heinricus prepositus ecclesie sancti Nycolai, Marchwardus prepositus de sancto Andrea, Sigboto decanus de Chrems, Cho^unradus decanus de Ramuolspach, Cho^unradus decanus de Louchse, Pilgrimus decanus de Tulin, Albertus decanus de sancta agatha, Otto prepositus de sancto Leonhardo, Albertus plebanus de Stadelowe, volmarus plebanus de Gors, Marchwardus plebanus de Rakz, Hermannus plebanus de Tobraichschirchen, Dietricus plebanus de Mistelbach, Eberger plebanus de valwa, Eberger de Abstet, Sarilo plebanus de Gowats, Gotfridus plebanus de Niwenchirchen, Gotfridus plebanus de Werde, Gotscalcus plebanus de Wldinesdorf, Vlricus plebanus de Sigehartschirchen, Gebehardus plebanus de Chapell, Ro^udolfus plebanus de Herzougenburch, Meginhardus plebanus de Stainchirchen, Albertus plebanus de Pecenchirchen, Arnoldus plebanus de frowendorf et alii quam plures honorati uiri. Acta sunt hec anno incarnationis domini M. C. LXXXVIIII. mense julio in capitulo celebrato Chrems jura poli Clemente imperante, jura fori friderico feliciter administrante.

Source Fulltext: OÖUB 2 (Wien 1856), S. 418-420