Ego Kalchochus de Valckenstain ministerialis Ecclesise Patauiensis ad notitiam tam prsesentium quam futurorum cupio peruenire, ad quos praesens peruenerit scriptum, quod in bonis meis in loco, qui dicitur Slage, Coenobium exile ad honorem Dei et Beatae Virginis Mariae fundaui de Domini Wolkeri Episcopi Patauiensis voluntate beneuola et consensu, quod ordini Griseorum dederam, et ipsum locum et coenobium abbati et ecclesise in Langhaim commiseram in perpetuum ad regendum. Cumque domini fratres ecclesiae de Langhaim in Slage annis septem cum dimidio permansissent, quodam tempore ipsum locum solitarium relinquentes, in Langhaim ad monasterium suum, unde uenerant, noctis in silentio redierunt, secum assumptis libris, calicibus et ornatu, de quo fui nimium conturbatus, quod ipsi coenobium per me ipsis traditum comtempsissent. Tamen ego trinos nuncios cum litteris ipsis direxi supplicans, ut redirent, diligentissime et inuitans. Qui deliberatione praehabita de communi consilio mihi remandauerunt, quod unus Abbas et unus monachus ibi prae fame et frigore essent mortui et quod locum non amplius curarent et quod ipse fundator locum et fundationem suam in Slage assignaret et daret, cuicumque vellet, de eorum grata et mera ac spontanea voluntate. Tunc ego quid facerem ignoravi. Tandem de consilio sapientum ac etiam amicorum fundaui coenobium in alio loco et idem coenobium cum omnibus attinentiis commisi et assignaui libere et solute abbati et conuentui in Milewsk ad tenendum perpetue et regendum secundum B. Augustini et Praemonstratensium regulam et statuta, et in ipso coenobio fratres cum praeposito ex praefato coenobio actuali vita et residentia collocaui. Et ne alicui in posterum super his dubium oriatur, in huius rei testimonium et cautelam dedi praesentes litteras saepedicto praeposito ac fratribus mei sigilli munimine roboratas. Huius rei testes sunt Chundericus filivs meus, Otto de Wesen cum fratre suo Henrico, Sigifridus de Morspach, Wernherus de Haichenpach, Rudegerus miles Wesnerii, Engelbertus miles de Liechtenek, Rupertus, Leopoldus, Gerungerus, Petrus, Fridericus clientes mei. Datum anno Domini millesimo ducentesimo decimo octauo VII Idus Julii.

Source Fulltext: OÖUB 2 (Wien 1856), S. 597-598