Nos Chundericus totusque Conuentus monasterii in Langhaim Uniuersis uolumus fore notum tam prasentibus quam futuris, quod in loco, qui Slage nuncupatur, honorabilis vir Dominus Kalchochus de Valckenstain ad honorem Dei et B. Virginis coenobium ordinis nostri construxerat et fundarat, in quo fratres nostri ordinis ex nostro monasterio primo instituit et locauit et eundem locum cum omnibus ad dictum locum spectantibus nobis et ecclesiae nostrae commiserat et donarat perpetue possidendum. Et cum in saepedicto coenobio fratres ecclesiae nostrae aliquot annis cum magnis defectibus permanerent, quadam uice penuria et defectu uestitum continue aggrauati, locum relinquentes desolatum nocturno tempore pariter inde ad nostrum monasterium redierunt. Praedictus uero Kalchochus fundator praefatum locum nobis renunciantibus monasterio et abbati Milocensi (sic) et ordini Praemonstratensi tradidit et assignauit de nostra spontanea voluntate. Eapropter ad petitionem fundatoris praetactum locum seu coenobium in Slage cum omnibus ad eundem spectantibus tradimus monasterio et Abbati in Milewsk, sicuti nostro ordini et nostrae ecclesiae traditus fuerat et commissus, renunciantes omnibus priuilegiis nostris habitis et habendis et cuilibet iuri nostro tam Canonico quam ciuili. In cuius rei testimonium praesentes litteras dedimus saepedicto loco monasterio in Milewsk (sic) conuentui et fratribus sigilli nostri munimine consignatas. Datum anno domini M. CC. XVIII. XII. Kal. Julii.

Source Fulltext: OÖUB 2 (Wien 1856), S. 595-596