IN nomine sancte et indiuidue trinitatis Gebhardus dei gracia Patauiensis episcopus dilectis in Christo fratribus Ulrico preposito eiusque successoribus canonice substituendis et Capitulo sancti Nycolai et Otacharo Decano*) eiusque successoribus canonice substituendis imperpetuum. Ne lites ex litibus oriantur aut ea, que fuerint preuia racione salubriter decisa, valeant a posteris propter obliuionem in iudicium denuo reuocari, ea, que inter homines geruntur, merito scriptis autenticis commendantur. Huius rei gracia uobis uestrisque successoribus in futurum prouidere cupientes decisionem controuersie, que super obuencionibus ecclesie sancte Marie aput Anasum site inter uos est habita, presenti pagine commendamus. Siquidem cum prefixus fuisset partibus dies peremptorius ab abbate de Alderspach et eius coniudicibus, quibus cognicio cause a Romano fuerat pontifice demandata, per viros discretos et honestos pro bono pacis actum fuit, quod partes in arbitros compromiserunt sub pena XXX. librarum, quibus in die ad arbitrandum prestituto pariter conuenientibus examinacione prehibita diligenti in presencia prepositi et prefati Decani anasensis sunt arbitrati, quod quecumque res mobiles seu se mouentes sev immobiles, quocumque nomine censeantur, hoc est siue denarij siue cerei siue casei siue animalia siue predia siue domus siue quelibet res alie in missa in Pentecosten uel in Natiuitate sancti Johannis baptiste uel in Assumpcione beate virginis uel alio quocumque tempore, quo populus aliarum plebium illuc pro deuocione conuenerit, offerentur, decano siue ipsius successori, Custodi sancti Nycolai siue ipsius uicario, si vicarium ipsum contingeret habere, in duas partes equa proporcione bona fide diuiderentur, quarum vna decano siue ipsius successori reliqua custodi sancti Nycolai siue ipsius nuncio absque omni cederet diminucione, Denarij uero ante missam, prout cuique ipsorum a populo in manus offerentur, accipiencium absque vlla diuisione permanerent. Quod cum ad ipsius capituli sancti Nycolai noticiam peruenisset, Capitulum se nimis enormiter lesum per tale arbitrium racione ultimi articuli asseuerabat Ideoque propter ipsius contradictionem arbitrium in publicam formam non fuit redactum nec consensu chori Patauiensis roboratum, cuius erat tum ex forma compromissi tum propter absenciam Dyocesiani (sic) Episcopi tunc in ultra marinis partibus commorantis Auctoritatem et robur sue ratihabicionis impertire. Demum uero partibus in inuicem concordantibus arbitrio stare decreuerunt Vltimo articulo immutato ita uidelicet, ut quecumque res mobiles seu se mouentes seu eciam inmobiles, quocumque nomine censerentur, siue ante missam siue in missa siue post missam siue circa vesperam in supra notatis sollempnitatibus seu temporibus offeruntur, Decano predicto siue ipsius uicario, Custodi sancti nycolai siue ipsius vicario, si et ipsum vicarium contingat habere, omnes bona fide in duas partes equa proporcione diuidantur et singule singulis, prout premissum est, bona fide absque diminucione tribuantur. Porro priuilegium sancte memorie Altmanni Episcopi Patauiensis, quod supra dictam ecclesiam ad luminaria ecclesie sancti Nycolai ab ipso traditam manifeste declarat cum omni utilitate tam in oblacionibus quam in areis et censualibus super iure proprietatis ipsius ecclesie tantum in suo robore integrum et saluum permaneat, in omni utilitate tam oblacionum quam aliarum obuencionum prorsus innouato quantum, ut premissum est, secundum huius pagine tenorem omnis utilitas in diuisionem uenit bona fide. Ad ultimum uero coram nobis conparentibus Preposito et capitulo per se et decano anasensi per suum nuncium munitum litteris rati habicionis et mandati nobis humiliter et instanter supplicauerunt, quatinus premissam decisionem nostra dignaremur auctoritate confirmare. Presentibus igitur et consencientibus Dominis de choro Patauiensi auctoritate, qua diuina gracia largiente fungimur, confirmamus et presentis scripti patrocinio conmunimus eandem Statuentes, ut siqua parcium huic pagine temere uoluerit contraire, iuxta quod premissum est, alteri parti XXX. libras Wiennensis monete persoluat nullius obstante contradiccione. Et ut in nulla sui parte presens pagina possit uacillari aut ab ullo successorum inposterum calumpniari, nostrum sigillum et chori Patauiensis et parcium sigilla eidem fecimus apponi. Datum Patauie anno domini M.CC.XXII. Indiccione decima, iij. Nonas Julij, Pontificatus nostri anno primo. Huius rei testes sunt Otto Decanus Patauiensis, Chalohus, Magister Heinricus zobelinus, Eberhardus de Jahenstorf, Chrafto, Eberhardus de Faeuhtenpach Canonici Patauienses, Magister Dietricus, Guntherus plebanus de Lozperch, Magister Einwicus.

Source Fulltext: OÖUB 2 (Wien 1856), S. 634-636