Nos Ottokerus DEI Gratia Dux Austriae et Styriae et Marchio Moraviae innotescimus universis, quod fideli nostro Diethmaro de Steyr honestatis suae meritis inclinati, jus nostrum in Losstein duximus conferendum, volentes firmiter, ut feudo suo, quod Burglehen vulgariter dicitur, in Castro Steyr pleno jure gaudeat velut ante, in quo Castro inimicos suos non locabimus aliquatenus ex permisso in suum Praejudicium aut Gravamen, super haec ut favoris nostri plenitudinem adesse sibi sentiat cum effectu, ducenta Talenta persolvemus eidem, ut et ipse nobis adesse debeat perpetuo omni obsequio et fidelitate, nec de cetero teneat civitatem nostram Steyr et alias possessiones et alia quaeque, quae contingunt ex debito nos et nostros in nostrum et nostrorum Praejudicium occupata, sed permittat nos et nostros in singulis nostris possessionibus et juribus pacificos et quietos. Caeterum contra et suis remittimus universas injurias atque damna, quae nobis et nostris a morte illustris Ducis Austriae Friderici noscitur irrogasse, in cujus facti memoriam et cautelam cum subscriptione testium dari mandavimus has patentes literas Sigilli nostri munimine roboratas. Testes sunt Venerabilis amicus noster Dominus Cunradus Frisingensis Episcopus, Comes Otto de Hardeck, Comes Ulricus de Phannenberg, Albero de Pollenhaim, Albero de Chunringen Pincerna Austriae, Wotsko Comes de Pernecke et Burggravius in Znaym, Cunradus de Zelckingen, Gundackarus de Stahrenberg, Ulricus de Capell, Wolfkerus de Paravu et alii quam plures, actum et datum apud Linzam Anno Domini Millesimo Ducentesimo Quinquagesimo Secundo Tertio Kalendas Septembris.

Source Fulltext: OÖUB 3 (Wien 1862), S. 184-185, Nr. 193