Nos B. miseracione diuina Archiepiscopus Colocensis, Aule Illustris reg. Hungr. Cancellarius, Rolandus comes palatinus et posoniensis, Stephanus dux tocius Sclauonie, Chak summus camerarius et comes Superniensis arbitratores domini B. incliti regis Vngarie Significamus Vniuersis presencium per tenorem, quod, cum ex parte predicti domini nostri constituti fuissemus super ordinacione pacis et concordie inter prefatum dominum nostrum regem et P. Illustrem dominum regem Boemie deputatis nobis et associatis coarbitratoribus Venerabili in Christo patre B. dei gracia Episcopo Olmocensi, Wythycone de noua domo, Otthone de Messe (sic, pro Meyssau), Kadoldo orphano, Wykardo de Terna (vielleicht Tyrna) ex parti prefati P. domini regis Boemie ad ordinacionem ejusdem pacis et concordie cum effectu, tractatu prehabito diligenti tandem conuenimus in hac forma, quod dominus noster rex Hungarie et sui heredes ducatum Stirie cum omnibus attinenciis suis et iuribus possidebunt iure perpetuo et tenebunt usque ad terminos infra scriptos, scilicet a summitate montis, qui dicitur Semernyk, secundum quod eadem montana pro diuersitate locorum adiacentium diuersis nominibus nuncupata ab Hungaria in Bawariam protenduntur et in Bawaria terminantur, cursu aquarum uersus Muram ab eadem summitate moncium decurrencium terminos distinguente hoc adiecto, quod si Castrum Snarchumpah (sic) secundum decursum aque non cederet in partem Ducatus Stirie domino nostro regi, prefati nuncii et arbitratores domini P. regni (sic) Boemie assumpserunt super se obtinere cum effectu a domino suo predicto, quod in partem domini nostri regis transeat cum omnibus suis attinenciis et iuribus et assignetur perpetuo possidendum. Ab eadem autem summitate montium secundum cursum aquarum uersus Danubium fluencium illam porcionem Stirie cum toto Ducatu Austrie predictus P. dominus cum suis heredibus iure perpetuo cum omnibus attinenciis suis et iuribus possidebit eciam et tenebit Ita insuper, quod dominus noster rex de parte illa, quam ipse possidebit, domine de Impirg (sic) satisfaciet, ut contra predictum P. dominum materiam non habeat conquerendi nichil propter hoc de Ducatu Austrie retentura. Et dominus P. de parte illa, quam ipse tenebit, satisfaciet domine preclare uxori sue, si ipsum premori contingat, et heredibus ipsius ita, ut nullam contra dominum nostrum regem ipsa uel ipsius heredes in parte illa, quam rex tenebit, possit habere questionem. Facta autem cognatorum et amicorum utriusque partis iuxta ipsorum decenciam tunc ordinabuntur, quando dominus noster rex et dominus P. prefatus ad colloquium et tractatum conuenerint loco et die ad hoc communiter assignatis. Vt autem de istis articulis nichil per dominum nostrum regem immutetur, in animam suam corporale prestitimus iuramentum et sigillorum nostrorum fecimus appensione roborari. Actum anno domini M.CC.LIIII, apud Budam Sexta feria ante dominicam palmarum.

Source Fulltext: OÖUB 3 (Wien 1862), S. 204-205, Nr. 210