Ottocarus Dei gratia Rex Bohemiae, Dux Austriae et Stiriae et Marchio Moraviae Dilectis fidelibus suis Judicibus provincialibus et civitatensibus per Austriam et supra Anasum constitutis gratiam suam et omne bonum. Certa relacione intelleximus, quod quaedam detestabilis consuetudo, imo potius coruptela peccatis malorum exigentibus in vestris partibus contra Dominum et Justiciam inolevit, videlicet, quod Praelatis, Rectoribus seu Plebanis Ecclesiarum decedentibus quidam improbi Laici, imo potius crudeles tyranni res mobiles et immobiles quandoque decedentium Clericorum praesumunt temere usurpare ac rapere violenter. Et quia summum bonum in vita est iustitiam colere et jus suum unicuique obseruare et maliciis hominurn libertati Ecclesiasticae detrahentium obviare, fidelitatem vestram commonemus diligentissime et hortamur, addentes nihilominus praeces regias et districtum mandatum, quatenus factum tam impium et enorme per totum nostrum Dominium impune fieri nullatenus de caetero permittatis, reos tantae maliciae taliter punientes, ut ipsorum pena metus esse debeat aliorum, nec ullatenus dubitetis, quoniam praesens nostrum mandatum quomodolibet negligentes, cum super hoc querelam receperimus, sine lenitatis mansuetudine puniamus. Datum Pragae XI. Kalend. Februarii Anno Domini M.CC. LXVI. Indictione nona.

Source Fulltext: OÖUB 3 (Wien 1862), S. 344, Nr. 367