Nos Ortolfus miseracione divina Totumque Capitulum ecclesie Sekowensis notum facimus vniuersis presens scriptum intuentibus, quod, cum anno preterito per dominum Chraftonem honorabilem Canonicum nostre ecclesie Alramnum et Rudolfum nobiles de Alhartinge pro predio nostro in Pvrgwerd, quod ecclesie nostre iniuste detinuerunt, in placito generali fecissemus conueniri et hoc tam diu, quoadusque sententia proferri deberet et finaliter iudicari per dominum Vlricum de Lobenstein nostrum Advocatum et Amicum specialem ac alios probos viros, ex voluntate utriusque partis pariter et consensu sic extitit arbitratum, quod idem canonicus predictum predium in Purgwerd predictis nobilibus Alramo et Rudolfo ac ipsorum liberis hereditario censu, quod vulgariter Erbdinst dicitur, conferret Auctoritate Capituli nostri Seccowensis. Quod arbitrium ratum habere promittimus et acceptum jta tamen, quod singulis annis predicti Alramus et Rudolfus vel eorum liberi Quadraginta denarios infra Assumptionem et Natiuitatem beate virginis nobis et ecclesie nostre persoluere sint ligati. Quod si non fecerint, Ingenuus vir dominus Vlricus de lobenstein noster advocatus vel ipsius liberi predictos ad id faciendum compellere sit ligatus. Ad hec iidem nobiles ecclesie nostre seruire fideliter promiserunt. Et ne alicui super hoc dubium oriatur, presentem cartam sigillis nostri et domini Vlrici de lobenstein nostri Aduocati fecimus comvniri. — Datum Sekowe Anno domini M. CC. LXX. III. Testes sunt hii: domini Arnoldus Pyber, Heinricus de Hag milites, Domini Ludwicus, Vlricus Parw, Rudolfus famulus noster, Hermanus Judex, Wernhardus Officialis, Chunradus de Heyde, Paldereich et alii quam plures.

Source Fulltext: OÖUB 3 (Wien 1862), S. 402, Nr. 439