Bertholdus Dei gratia Babenbergensis ecclesiae episcopus omnibus in perpetuum. Equitas rationis et censura iusticie nos inducunt, ut memoriter recolentes et deuotione laudabili attendentes illa largiflua munera gratiarum, que serenissimus dominus noster Rudolfus Romanorum rex inclitus suique predecessores diui imperatores et reges Romanorum illustres nobis et venerande Babenbergensi ecclesie liberaliter impenderunt, ad reddendam sibi et suis condigne uicissitudinis repensiuam propriis affectibus et propriis effectibus inclinationem ut, dum per eorundem principum munificentiam nos et ecclesiam nostram dotatos pariter et ditatos esse cognoscimus, digne ipsis gratitudinis debitum laudabiliter exolvamus, Eapropter nosse volumus uniuersos tam posteros quam presentes, quod nos tantorum beneficiorum, que nos et ecclesia nostra de manibus principum Romanorum et specialiter domini nostri Rudolfi Romanorum Regis predicti recepimus, non immemores nec ingrati, ut nostre fidei claritas, quam ad ipsum et Romanum imperium gerimus, sibi plene claresceret, ipsum in liberis suis specialiter duximus honorandum. Nam feuda illa uniuersa et singula, que nobis et ecclesie nostre per mortem clare memorie principum Austrie, Styrie, Karinthie, Carnyole et Marchie in eisdem terris vacare ceperunt, et specialiter castrum Mutenberch cum muta et omnibus suis pertinenciis illustribus viris filiis suis Alberto, Hartmanno et Rudolfo ac eorum liberis heredibus masculis tantum contulimus ipsumque ad instar et formam dictorum principum infeudavimus de eisdem ita tamen, quod feudorum huiusmodi dictis suis filiis concessorum ordinatio et conservatio in ipsius domini nostri regis manibus remanebit tantum pro tempore rite sue. Si vero dicti liberi sui decederent sine filiis heredibus, dicta feuda vacantia et absoluta ad Babenbergensem eeclesiam libere reuertentur. Hanc nostre fidei claritatem, quam ipsi domino nostro regi in liberis suis ostendimus, et obsequiose deuotionis promptitudinem, qua suum et imperii honorem et gloriam, sicut tenebamur, ex debito hactenus indefesse coluimus, idem dominus noster rex gracioso vultu respiciens et propter hec et alia, que sibi et imperio tempore, quo imminebat necessitas, constanter impendimus nostre devotionis obsequia, nolens nos et ecclesiam nostram digna retributionis vicissitudine defraudari, hiis nos libertatibus et gratiis, que inferius annotantur, de regia pietate decrevit liberaliter honorandos. Primo videlicet, quod ab aduocatia in Velkirchen suo et filiorum suorum nomine vel cuiuscunque terre principis aut domini futuri in Karinthia nihil aliud exigatur, recipiatur aut requiratur nisi tantum ius illud, quod in litteris super collatione dicte advocatie confectis venerabilis quondam Hermanni Babenbergensis episcopi et illustris quondam Hermanni ducis Karinthie sigillorum munimine roboratis evidentius est expressum, iniustis iudiciis, exactionibus et steuris indebitis et aliis vexationibus, que a dicta aduocatia ultra ius in dictis instrumentis expressum hactenus sunt extorte, sublatis penitus et deletis. Preterea renunciauit et cessit idem dominus noster rex pro se et filiis suis ac omnibus futuris Austrie et Styrie ducibus et dominis omni iuri, quod sibi competiit in advocatiis de Hage, de Chirchdorf et valle Gerstental, quod quondam principes Austrie et Styrie ab ecclesia Babenbergensi in feudum tenuerunt; ipsas advocatias cum redditibus, prouentibus, iudiciis, siluis, pratis, pascuis, nemoribus et generaliter omnibus iuribus et bonis quesitis et inquirendis ad dictas advocatias pertinentibus nobis et ecclesie nostre libere et absolute relinquens ac volens nos et successores in sepe dictarum advocaciarum ac ipsis attinentium possessione pacifica illesos perpetuo conservari, ita tamen, quod nos et quilibet episcoporum Babenbergensium suecessorum nostrorum, qui pro tempore fuerit, de predictis advocatiis singulis annis in festo sancti Georii viginti talenta Wiennensium denariorum nostre et successorum nostrorum in eisdem principatibus camere solvere teneatur. Item renunciauit et cessit dominus noster rex predictus omni actioni seu iuri, quod sibi in quadam area in castro Strazfride compeciit siue competere videbatur, que per quendam Babenbergensem episcopum duci Karinthie data fuit. Insuper quia nos tempore, quo filiis domini nostri predictis feuda terrarum prenotata contulimus, castrum Werdenberch cum quadraginta marcarum denariorum redditibus de feudis antedictis deduximus, nobis et ecclesie nostre de beneplacito, domini regis predicti perpetuo retinendum, idem dominus noster rex pro se, filiis suis predictis et uniuersis successoribus suis ac principatu Karinthie deductioni, retentioni et reseruationi castri predicti cum omnibus iuribus et pertinentiis suis consensum suum perpetuum adhibuit et assensum promittens firmiter pro se et filiis suis ac principibus predictis nos et ecclesiam Babenbergensem pro dicto castro et suis attinentiis numquam de cetero impeti vel turbari, hoc tamen signanter adiecto, quod redditus castri predicti, qui redditus XL. marcarum denariorum excesserint, suis et successorum suorum usibus attinebunt prouinciali iudicio, quod eidem castro usque modo deseruire consueuit ipsis XL. marcarum denariorum redditibus nihilominus intercluso.||
Promisit insuper dominus noster rex predictus pro se, filiis suis et successoribus suis nobis et ecclesie nostre predicte, quod iidem principes nobis et nostre ecclesie ac successoribus nostris aderunt consilio, auxilio et favore ad hoc, quod uniuersa feuda, quae nobis et ecclesie nostre iam vacant et que deinceps in dictis terris per mortem cuiuscunque et in aliis terris per mortem principum, comitum, nobilium, ministerialium vel aliarum personarum, cuiuscunque condicionis aut status existant, vacare inceperint, et nos et ecclesia nostra plene et integraliter assequamur. Similiter in feudis illis, que nobis et ecclesie nostre per statuta siue tradiciones imperiales et regales aut per sententias iudiciarias vel per modum alium debitum et consuetum vacare ceperunt, vel ceperint in futurum, nobis et nostre ecclesie aquirendas dictum dominum nostrum regem, liberos suos ac successores suos predictos adiutores habebimus et utiles promotores. In quorum feudorum iuribus et libertatibus conservandis ipse dominus rex, filii et successores sui in terris predictis prefate ecclesie nostre defensores esse tenebuntur pariter et tutores. Acta sunt hec presentibus viris et dominis venerabilibus Petro Pataviensi episcopo, Johanne Gurcensi episcopo, Rudolfo imperialis aule cancellario, magistro Gotfrido domini regis protonotario; viris quoque illustribus et spectabilibus domino Alberto duce Saxonie, Friderico burgrauio de Nurenberch, Eberhardo comite de Catzenellpogen, Gerhardo comite de Rinek, Ulrico de Trouers et aliis quam pluribus. In predictorum omnium testimonium et perpetui roboris firmitatem presentes litteras sigilli nostri munimine roboramus. Nos quoque Heinricus prepositus, Emicho decanus totumque capitulum Babenbergensis ecclesie in signum ratihabitionis omnium premissorum et pleni consensus nostri, qui ad predicta accessit, sigillum capituli nostri presentibus duximus appendendum. Datum apud Babenberch anno Domini millesimo ducentesimo septuagesimo nono XV. kl. Octobr.

Source Fulltext: OÖUB 3 (Wien 1862), S. 502-505, Nr. 544