Ich Gundaker von starchenberch tuen chunt allen den, (die) disen brief ansehent, daz der herre apt chvenrat von seiteinsteten chriegt mit vron chunegvnden Otachers havsvrawen von Stille vmbe ein wis in dem reintal, der chriech ist also geendet, daz er der apt von seitensteten hat der der vorgnanten vron chunegvnden dieselben wis in dem reintal verlihen ir vnd ir chinden, diu si pi Otacheren hat, ze ir tagen vnd der chind tagen ze einem zins, das si alle iar an sant Georientag von der vorgenanten wis svlen dienen zwainzich phenning wienner munzze. ob si den zins versezzen, des ich niht getrawen noch gelawben, so sol diu oft genant (wis) vnser vrawen ze seitensteten an allen chriech vnd an alle ansprach ledich sein. vber die red han ich den prief beziugt mit meinem insigel.

Source Fulltext: OÖUB 3 (Wien 1862), S. 525, Nr. 568