Nos Rudolffus dei gracia Romanorum rex semper augustus tenore presencium ad vniuersorum tam presencium quam etiam futurorum volumus peruenire (noticiam), quod nos multa fidelitatis opera, que cum deuocione laudabili strenuus vir Vlricus de Capella dilectus fidelis noster crebro nobis exhibuit, benignius intuentes sibi montem et castrum Rutenstain cum duorum et dimidij talentorum redditibus attinentibus eidem castro pro quadringentis talentis denariorum wiennensium, quos sibi pro gratis suis obsequijs nos daturos promittimus, liberaliter obligamus jta, quod ipse et Elizabeth vxor sua ac heredes vtriusque sexus, quos ex ea genuit vel in posterum generare contigerit, ipsum castrum et montem iusto obligacionis titulo tam libere et quiete debeant obtinere, quousque eis per nos aut verum dominum terre Austrie eadem quadringenta talenta et omnia et singula, que exposuerunt vel exponent in fossatis, muris et structuris circa castrum predictum, iuxta fidedignorum virorum consilium plene data fuerint et soluta. Qua vero solucione perfecta ipse vlricus, Elizabeth vxor sua et heredes vtriusque sexus procreati seu procreandi ex ea aut alij heredes sui proximi, si ex ipsa Elizabeth heredes superstites non habuerit, in predicto castro castellani castrensi jure perpetuo permanebunt. In hijs autem et in alijs quibuscumque, que eidem Vlrico et suis heredibus prenotatis obligauimus siue dedimus, nos vel quicumque dicte terre dominus fuerit, ipsos manu tenere tenebuntur et tueri. In cuius rei testimonium presens scriptum exinde conscribi et maiestatis nostre sigillo iussimus communiri. Datum Wienne VI. nonas Maij, jndictione IX. anno domini M. CC. LXXXI, regni vero nostri anno VIII.

Source Fulltext: OÖUB 3 (Wien 1862), S. 530, Nr. 575