Wir Heinrich von Witrach vnd Chungent min Housfrowe vnd Alber vnser Sun vnd Hadmar vnser Enichel tun allen den chunt, die disen brieff ansehent, daz wir vnserm lieben dem Rehe vmb den dienst, den er vns hatt getan vnd vns noch erbieten mak, vnser halbez hows Lufftenberg, des aigenschafft vns angehoret, verlihen haben ze rechtem Lehen im vnd seiner housfrowen Vron Mechtilde vnd ier zwayer erben ewiglich von vns ze haben vnd allez daz gu^et, daz zu dem selben taile des vorgnanten hovses gehoret, als iz Her Hainrich von Hage von vns hatt gehabt. Vnd loben auch daz an disem Prieve, daz wir das vorgenante halbez hovs vnd daz gu^et, daz dazu^e gehoret, nicht zu vremden handen bringen soln. Wir sollen iez vnsern Erben lazzen vnd suln auch iez den vorgenanten schennen (schermen) nach gemeinem rechte, daz daz also stette belibe, so hab wir dem vorgenannten Rehe vnd seinen Erben disen brief gegeben ze einem Vrkundte mit vnserem insigel verinsigelt vnd her Leutolt von Chunring hatt auch sin Insigel daran geleit ze einer cevchsal (sic), Wend im diz dinch wol chund ist vnd gewizzen Dises gescha^efftes vnd dises dinges sint gezeuch Herr Hainrich von Chu°nring, Herr Vlrich von Cappelle, herr Chunradt von Haage vnd herr Gotschalk von Vlachenecke, herr Rudger von Zoucha, herr hainrich von dem Wasen, herr hainrich von Oedte, herr Chunradt von Praitenvelde, her hertwich von dem Wasen vnd herr Greiffe von Wienne, her Alram von Hertwigestein, Chvnrat Gnovsse, wiker vnd manig ander man. Diser brief ist gegeben zu Tirnstain von Christes gebuert vber tovsent Jar zwaihundert Jar in dem funf vnd achtzigestem iar des nachsten Phinztages nach sand Vrbanes tak.

Source Fulltext: OÖUB 4 (Wien 1867), S. 35, Nr. 39