Wernhardus Dei gratia ecclesie pataviensis Episcopus Dilectis in Christo fratribus vniversis prelatis, abbatibus, prepositis, Archidyaconis sue dyeceseos salutem et sinceram in domino karitatem vestra fraternitas nos recepisse literas et mandatum Reverendi domini et patris nostri domini R (Rudolfi,) sancte salzpurgensis ecclesie Archiepiscopi noverit in hec verba: Venerabili in Christo fratri et amico karissimo Domino W. pataviensis ecclesie Episcopo Rud. Dei gratia sancte Salzpurgensis Ecclesie Archiepiscopus, Apostolice sedis legatus, Imperialis aule cancellarius sinceram et fraternam in domino karitatem. Audiuimus frater dilectissime, quam nos audisse oportuit sed audisse profecto non libuit querelam grauem et dolore non uacuam prelatorum et generaliter nostre prouincie clericorum, quod emunitas ecclesiastica hactenus sub vigore debito conservata — angariis et parangariis — aliisque seruitutis oneribus ad diminucionem capitis vltimam potestate laica tam indebite sit inducta et cottidie deducatur et serva de libera — et ancilla iam facta de domina — Status et condicio ecclesie per partes nostre prouincie de gloria in ignominiam sit mutata — Vnde quamuis triste sit nobis ualde, quod loquimur, — suscepti tamen sollicitudo regiminis instanti cor nostrum pulsat aculeo et prophete nos monet excitacio non ascendentes ex adverso — neque oponentes se murum pro domo israel increpantis, — ut iminentibus periculosis — periculis celeri consilio et provido remedio ouiemus — ne videamur mercenari — sed veri pastoris uicem, qui animam suam pro ovibus suis posuit, possidere. Sane quia iubente iuris regula, quod omnes tangit, debet ab omnibus approbari, fraternitatem vestram requirimus et monemus, vobis in virtute sancte obedientie firmiter iniungimus et mandamus, quatenus associatis vobis omnibus et singulis — Abbatibus, prepositis, Archidiaconis, ac aliis prelatis vestre civitatis et dyeceseos ad provinciale capitulum Salzpurge in vigilia sancti Mathej apostoli peremptorie celebrandum omni excusacione postposita veniatis, quatenus de vestro aliorumque suffraganeorum et prelatorum nostre provincie communi consilio et auxilio adunato — modos et vias pariter inquiramus, quibus pro defensione gregis et pro statu incolomj, libertatis Ecclesiastice conservando, valeamus adversis mundi potestatibus contraire, Absit nempe, ut nostris temporibus inestimabilis hereditas et libertas contra priuilegia apostolica et imperialia subigatur iugo tributarie exemplo perniciose, et in malam et perpetuam trahende consequenciam servitutis, melius siquidem incidere in manus principis temporalis, quam predia usibus secretorum celestium dedicata, prophanis dissimulanter submittendo abusibus, etternam ledere majestatem. ||
Datum Salzpurge — anno Domini M.CC.LXX. sexto pridie ydus Augustj. Huiusmodi itaque mandatum reverenter ac decenter, ut tenemur (re) cupieutes vniversis vobis ac singulis iniungimus ac mandamus, quatenus vos obmissis excusacionibus quibuscunque studeatis taliter apparari, ut una nobiscum in dicto concilio concurratis.||
Datum in Euerdingen XII. Kalendas Septembris.

Source Fulltext: OÖUB 4 (Wien 1867), S. 46-48, Nr. 52