Ich Otakker von Lobenstain tvn chvnt alle den, di disen brief an sehent oder lesent, daz ich hern Chv^enrat von Chapelle han geben di aigenschaft an den zwain hveben ze paeschinge, di Eberhart bei dem tor ze lintz von mir het, vnd bin ovch der selben zwaiger hveb sein gwer fvr mein brveder vnt fvr alle ansprach an alle der stat, vnt er ez an mich svecht, vnt ob im dar an icht ab gienge, daz im leicht di vor genanten hveb wurden an behapt, so sol ich im sehzich phvnt schuldich sein vnt sol di haben ovf alle dev, vnt ich han vnt daz daz staet vnd vnuerchert beleibe, gib ich im disen brief ze vrchvnde versigelt mit minem insigel vnt mit den gezevgen, di hie geschriben stent: her hainrich von volchenstorf, her hainrich von lonstorf, her Otte sein brveder, Rveger der hvttaer, hainrich von dietreiching, her vlreich der movter ze lintz, her hainrich sein brveder, her hainrich der pranter. Daz ist geschehen, do von vnsers herren gebvrte ist gewesen Tovsent iar, zwai hvndert iar vnt nevn vnt ahzich iar.

Source Fulltext: OÖUB 4 (Wien 1867), S. 115, Nr. 118