Ich Albreht von sant Peternelle vergih offenlich an disem brieve vnd tvn chvnt allen den, die disen brief lesent oder hoerent lesen, di nv lebent vnd her nach chvnftich sint, daz mir her Vlrich von Chappelle gelihen hat nevnzich march alter phenninge ovf allez daz, daz ich gehabt han datze Stetelndorf, ez sei an dem gerihte vnd ovf allez daz, daz ich in demselben dorfe ze lehen han gehabt von minem herren hern friderichen dem bvrgraven von Nvernberch, ez sei ze holtze oder ze dorfe, versvechet oder unversvechet, daz han ich im ovfgegeben fver daz vorgenant gvet vntze ovf sant Jorgen tach, der nv nehste chvnftich ist, mit solher beschaidenheit, gib ich im dem vorgenanten hern vlrichen hin wider an dem vorgenantem sant Jorgen tach die nevnzich march alter phenninge, so ist mir von im ledich worden allez daz, daz ich im ovf het gegeben in dem vorgenannten dorfe, ist aber, daz ich im niht wider gib an demselben sant Jorgen tage daz vorgenant gvet, so sol ich im nv von dem nehsten sant Cholmannes tach vber ein iar geben hvndert phvnt vnd zwaintzich phunt newer wienner phenninge; gib aber ich im der nicht an demselben sant Cholmans tach, so sol daz vorgenant gvet allez sein reht lehen sein von dem vorgenanten bvrgraven von Nvernberch also mit solher beschaidenhait, daz er immer fver daz rehte phvnt gvlte, daz in vrborn stet, ab sol slahen nevn phvnt wienner phenninge, daz an ekchern oder an gerihten leit, daz blozze phenninge genant sint, sol er abslahen fver sehs phvnt vnd daz verlihen gvet fver drithalp phvnt, Ovch sol dev wervnge geschehen vnt gewert werden in der stat ze wienne. Daz disev rede also staet sei vnt vestichait hab vnt vnuerwandelt beleibe, dar vber gib ich disen brief dem vorgenanten hern vlrichen zeinem sihtigen vrchvnde diser sache versigelt mit minen insigel vnt mit disen erwern gezevgen, die her nah geschriben sint, daz ist her Stephan von Meyssowe, her friderich der Chamerer von Lengenpach, her Chvnrat von Pilhdorf, Otte von zelkinge vnt ander biderbe levte genvege. Diser brief ist gegeben datze wienne des iares, do von Christes gebvrt ist gewesen Tovsent iar, zwai hvndert iar vnt in dem ain vnt nevntzigistem iar des dritten tages nah sant Mychhels tach.

Source Fulltext: OÖUB 4 (Wien 1867), S. 158-159, Nr. 171