ICH Herman von Chrannberch tuen chvnt allen den, die nv sind oder hernach chvmftich sint vnd die disen brief sehen oder horen lesen, daz ich mit gvetem willen vnd mit vorbedachtem muete vnd mit meiner Hausvrowen willen vorn Gedrauten vnd mit meins svns willen Hermans han vurchauft ein wisen, die leit da ze Chvnegesprvnne, vmb vumfzich phvnt phennige wiener hern Hadmarn von winchel vnd allen sein gerben, des selben guetes hat mich der selbe vorgenanter Hadmar von winchel schon vnd erberleich gewert; der vorgenanten wisen wil ich Herman von Chrannberch wer vnd scherm sein vor aller ansprache, als aigens recht ist. Daz der selbe chauf staete vnd vnzerbrochen beleibe, des gib ich vrchvnde mit disem chegenwortigem briefe mit meime anhangendem jnsigel vnd vnd mit den zeugen, die hernach geschriben stent: her Vlreich von wolfcherstorf vnd sein prueder her Dietreich von wolfcherstorf, her Chvenrat von Pvechperch, her Irnvrit von Pvechperch, her Marchart von Mistelpach vnd ander pider levte, den diser chavf wol chvnt ist. Daz ist geschehen da zte Wintendorf, da von Christ gepurt was Tavsent vnd zwai vnd Hvndert in dem zwai vnd Nevnzigistem iar an Sante Georgien tage.

Source Fulltext: OÖUB 4 (Wien 1867), S. 169, Nr. 183