Ich Heinrich von Cheiowe vnd min Hovsvrowe vro Chvnegvnt, di weilen Hern Otakers Hovsvrowe des Drvchsetzen, dem Got genade, ist gewesen, tv^en chvnt allen den, di nv lebent vnd noch chvnftig sint, Di disen Prief lesent oder ho^erent lesen, Daz wir mit des vorgenanten Hern Otakers Chindelin mit erberen schidlevten, di wir bedenthalben mit gv^etem willen zv schidlevten namen, also geschaiden sin, Daz wir zwai Hvndert Phvnt phenninge wienner mvniz fu^er daz Hovs zv vihoven genomen haben, als iz mit graben vmbe vangen ist Also, Daz wir vns des hovses verzigen haben vnd alles vnsers rechten daran, Daz wir fv^erbaz nimmer mer dehein ansprach vmbe daz vor genant hovs zv vihoven schvlen haben. Dar zv ist vns weizzenpach gesatzet mit allem dem, daz dar zv geho^eret fv^er drev hvndert phvnt wienner phenninge also zv rechter satzvnge, Daz wir daz gv^et in nvtze vnd in gewer schvlen haben mit allem dem rechte, alz iz her chomen ist mit dienst vnd mit steuwer, mit nachtselde, an daz wir di levte noch das gv^et von vnsern schvlden nicht verderben schvlen. Vnd swenne ouch man iz von vns lo^esen wil, Daz sol zv weinachten geschehen vnd zv dehainer zeit nicht mer in dem iar; so schvlen ovch wir iz zv lo^esen geben. Vnd sol ich vorgenanter Heinrich von Cheiowe vnd min Hovsvrowe vro Chvnegvnt noch dehain vnser erben, ob wir Chindel gewinnen, nimmer mer dehein ansprach ovf daz selbe gv^et zv weizzenpach gewinnen, swanne iz von vns erlo^eset wirt, noch ovf daz vor genant hovs zv vihoven. Swaz ovch wir vnder dem hovs zv vihoven gult haben oder anderswa in dem lande, daz miner Hovsvrowen vro Chvnegvnten leibgedinge ist, daz chvlen wir den vorgenanten Chinden zv losen geben je das phvnt geltes fu^er fvmf phvnt oder ein ander phvnt geltes sol man vns zv leibgedinge geben. Ovch ist ein Chriege zwischen vns gewesen vmbe daz gv^et, daz di vor genanten (sic) vro Chvnegvnden von ir Mv^eter, der Chinde Anen, oder von andern ir vordern mo^echt an ersterben. Des gicht Her friderich von Lengenpach der Chamerer zv O^esterreich, Der der Chinde veter ist, Daz anerstarben gv^et sei den Chinden geschaiden; Des gich ich Heinrich von Cheiowe vnd min Hovsvrowe vro Chvnegvnt nicht. Des haben wir vns baidenthalben mit gv^etlichem willen an die erberen schidlevt gesatzet, di iz vorgeschaiden habent. An Hern Stephan von Meissowe, An Hern Chaloch von Ebersdorf, An Hern Albrechten den Stuchsen, An Hern leupolden von Sachsengange, An Hern Heinrichen von Dvrrenpach Also: chvmpt vnser herre der Herzog Albrecht von O^esterrich zwischen hinne vnd O^estern, So schvlen di vorgenanten schidleut vmbe daz an erstarben gv^et pei ir aide sagen, wie iz geschaiden sei. Sturbe der schidlevt ainer in der zeit, des got nicht gebe, so schvlen di andern pei ir aide darvmbe sagen, wer aver, daz vnser Herre der Herzoge zv Ostern nicht cheme, so schvle wir pedenthalben mit gv^etleichem willen ainen nider setzen, vor dem di schidlevt sagen, swaz in chvnt sei. were, daz di vorgenanten schidlevt nicht fv^er chomen wolden, so sol in min Herre der Herzoge oder swer an siner stat sitze, mit gewalte fv^er gepieten. Wer, daz sich von êhafter not oder von vnser aines vnmvo^ez der tage verrvche, daz sol vnser ietwederm nicht schaden an sinem rechte. Dar vber gibe ich disen Prief versigelten mit minem Insigel vnd dise gezevge: Hern Levtolden von Chvnringe, Hern Chvnraten von Pylichdorf, Hern Hadmaren von Svnneberch, Hern O^ertlieben von winchel, Hern Ortolfen von Atzenprukke, Darzv ander. Daz ist geschehen zv wienne, Dv von Christes gepu^ert ist gewesen Tovsent Jar, zwai Hvndert Jar, jn dem zwai vnd Nevnzigistem Jar an sant Nycolas tage.

Source Fulltext: OÖUB 4 (Wien 1867), S. 175-177, Nr. 192