Ich Chalichoch von Eberstorf tv^en chvnt alle den, di disen brief horent vnd sehent, di nu sint vnd her nach chvmftich werdent, daz ich mit meiner hovsfro^ewen gu^etem willen vnd aller meiner erben geben han hern vlreich von chappelle hern pilgreims sv^en di manschaft auf alle diev, daz her Ru^eger der riedmaricher von mir gehabt hat, daz auch mein rehte lehen ist von meinem herren dem herzogen von O^esterich, swi daz ist, an perchreht, purchreht, an hofsteten, weinkarten, aekern, an vrbor, ze holtze vnd ze velde, versv^ehte vnd versv^ehte (sic) also, daz ich hern vlreich von chapelle, swenne er an mich fodert, sol auf geben vor meinem herren dem herzogen von Osterich oder wer der herzog niht, so sol ich iz laisten vor seinen chinden oder wer ich niht, so sullen iz mein erben laisten hern vlreich von chapelle oder wer er niht, sinen erben vber daz allez, daz verschriben ist; laiste ich chalichoh niht vnd mein erben hern vlreich von Chappelle vnd sinen erben also, daz wir in niht auf geben, als an dem brief geschriben stet, so stet daz vor genant gu^et hern vlreich von chapelle vnd sinen erben zwai hvndert phvnt phenning wienner mv^ense vnd vber diselben zwai hvndert phvnt sol er vns dannoch phenten oder sin erben vmb hvndert phvnt auf ander vnserm gu^et mit gu^etlichem willen an chlag vnd allez fu^erzog. daz dise red stet beleib vnd vnzebrochen, gib ich disen brif mit meinem jnsigel ze einen v^erchv^ende mit den zivgen, die hie geschriben sint: Hern Stephan von meissowe, hern friderich den chamerer von lengbach, hern otten von celking, hern marichart von mistelbach, her Jacob der Lantschreiber, hern greiffen, hern otten vnd hern haymen, di bru^eder sint, hern vlrich dem mvnsmaister vnd vnder biderber livt genuu^ech. Daz diser brief geschriben ist, do waz von Christ geburde Tavsent iar, zwai hvndert iar nach nevnzich iaren in dem andern iar an sant merteins tag.

Source Fulltext: OÖUB 4 (Wien 1867), S. 173-174, Nr. 189