Wir Friderich Burggrave von Nurenberch tvn kvnt allen den, di disen brif an sehent oder horent lesen, di nv sint vnd her nach kvnftik werdent, duz wir daz dorf ze Stetelndorf, daz ver Diemu^et her Levtoldes witebe von Stadek vnd albreh hern albrechts svn von sant petronelle von vns ze rehtem lehen gehabt habent, daz selbe dorf mit allev div, vnd dar zv geho^ert, swi daz genant ist, versveht vnd vnversucht, als ez div vor genant vrowe ver Diemu^et vnd albreht, der vorgenant ist, von vns gehabt habent, gelihen haben ze rehtem lehen hern vlreich von capelle vnd sinen svnen, di er hat bei vern Margareten siner havsvrowen oder noch gewinnet, vnd wer, daz derselben sv^en niht en were, so schol daz vor genant dorf vnd ander gv^et, als ez hi vor genant ist, an erben ander sin erben, di ez zv reht an erben schol. Dar vber geb wir im ze vrkvnde vnd ze gezevge disen brief bestetiget mit vnserm jnsigel. daz ist geschehen zv Kadolspurk nach Christe geburde tavsen zway hvndert jar, in dem fvmfe vnd nevnczigisten jar an der heiligen zwelf poten abent sent peters vnd sent pavls.

Source Fulltext: OÖUB 4 (Wien 1867), S. 224-225, Nr. 248