Wir Albrecht von gotes gnaden Herzog ze Oesterreich vnd ze Steyr, Herre ze Chrayn, avf der Marche vnd ze Portena^ewe veriehen vnd tvn chvnt allen den, die disen prief sehent oder hoerent lesen, di nv lebent vnd hernach chvnftich sint, Daz fvr vns chomen Chvnrat von Chappelle vnd sein veter vlrich von Chappelle, die von vns ze lehen habent daz havs Mitterberch vnd alles, daz dar zv gehoert, an vrbar, ze holtz vnd ze velde, verlehent vnd vnverlehent, versvecht vnd vnversvecht, swie so iz genant ist, vnd gab vns avf der vorgenante Chvnrat von Chappelle seinen tail an dem vorgenanten havse Mitterberch mit alle deu vnd dar zv gehoeret, als vor an disem prieve geshriben stet, Also beschaidenlichen, daz wir den selben seinen tail an dem vorgenantem havse Mitterberch verlihen seinem vetern vlriche von Chappelle vnd im selben. daz haben wir getan vnd haben im den vorgenanten tail an dem havse Mitterberch mit alle dev vnd dar zv gehoeret, verlihen ze rechtem lehen Also mit avzgenomner rede, Ist, daz der vorgenante Chvnrat von Chappelle stirbet ane Sv^ene, daz er niht sv^ene gewinnet, so ist der vorgenante tail, den er gehapt hat an dem havse Mitterberch, vnd alles daz dar zv gehoeret, seines vetern vlriches von Chappelle rehtes lehen von vns vnd aller seiner erben vnd geben im dar vber disen prief ze ainem vrchvnde vnd ze ainem gezivge vnd ze ainer ewigen vestnvnge diser sache versigilten mit vnserm jnsigil. Diser prief ist geben ze wienne des nahisten Eritages vor Phingisten, do von Christes gebvrt waren ergangen Tavsent zwai hvndert iar, jn dem sibinten vnd Nivnzigistem iare.

Source Fulltext: OÖUB 4 (Wien 1867), S. 263-264, Nr. 287