Ich phillipp von polnhaim vnd min hausvrawe vraw Marigret tun chunt allen den, di disen brief lesent oder horent, si sin lemptich oder tode, Daz her ortolf von hungerperg hat gesatz mit vnser hant vnd mit aller staet Dietmaren dem Ouen vnd siner hausvrawen Elizpeten den hof datz hungerperg w^er viercich phunt wienner phenning vnd ist daz geschechen mit bescheidener rede, daz her ortolf losen sol alle iar an sand Georigen tag, vnde hat Dietmaren dem ouen dar zv gelubt her ortolf, alle di wille er nicht loset, so sol her ortolf dev vber tewer an dem vorgenantem hof niemmen geben ze chauffen wan Dietmaren dem ouen; loset her Ortolf auer an sand georigen tag, so ist hof vnd vbertewer ledich von Dietmaren dem ouen vnd von siner hausvrawen Elizpeten vnd sol daz geben, swem er wil. Daz im daz staet vnd vnuerchert belibe, dar vber geb wir im disen brief mit vnserm insigel vnd di zivg, di hie gescriben stent: her wichart von polnhaim, her Rinprecht sin bruder, her Gundacher von Storichenwerch, her Gotfrid von pernawe, her Dietmar von aisterhaim, her heinrich der ouen, Dietmar von aisterhaim, hainrich von aistershaim, her Christan der vogt von wels, her Sibrant von Gelting, wernhard der richter ze wels, heinrich der Chropf, Dietrich der ouen, hainrich der ouen, vlrich von anhang, Leutold der dorn vnd ist daz geschechen, do uon Christes purt waren Tausent iar, dreu hundert iar an zwai iar an sand Georigen tag.

Source Fulltext: OÖUB 4 (Wien 1867), S. 282, Nr. 303